भ्वाथलय् स्वथनात:गु लुंया असर्फी !

रिता महर्जन                                                           लक डाउन कोरोना महामारींं भचा फुर्सद अले भचा ग्या:चिकुं जा:गु मोहनि!

” बिजया दशमीको शुभकामना…….!” ” बडा दशैंको शुभकामना ….!” थथे भनं फेसबुकया वाल जा: !
मेसेन्जरय् नं इपांथिपां मदयेक ताङ ताङ मेसेज न्यानाच्वं !
” ह्यापी बिजयादशमी ” “दशैंको शुभकामना “! स्टिकर भिडियो नं उलि हे वयाच्वनिगु !
अफलाईनय् भचा च्वना: अन्लाईनय् वये बलय् हाकनं घ्वारारा हे वइगु भिंतुनाया लहर ।
खँय्‌त पासापिं जूसां पाय्‌छिगु खँ ख:, उलि मपा: ! इमित नं अथे हे धया: लिसलय् जिं शुभकामना नं बियाच्वना ।
थन खँ अथे जक नं मखुत । थ:पिं विशुद्ध नेवा: जुयां नं थ:गु संस्कृतियात ल्वमंकाः थथे पोस्ट याना जुइपिन्त छु धायेगु ?
न जिं लाइक याये न कमेन्ट हे !
जिगु रिप्लाइ मव: धका: तंचाःपिं पासापिं नं दु। फेसबुक स्वस्वं थ्व खँ मनय् वयाच्वन जितः ।
थ:गु हे धुनय् फेसबुकया खँ त स्वयाच्वनाम्ह जि , अबलय् हे छ्म्ह नेवा: पासां मेसेन्जरय् कल याना:हल । कल ल्ह्वनेवं वं तं प्वंके थें धयाहल –
– “दशैंया शुभकामना धका: छ्वया हयां छं रिप्लाइ छक: नं बिमला: का मखुला !” वया: खँय् तहँ खनेदु
– ” नेवा: साहित्यय् च्वया: छला स्टार जुल खनिं ! नेवा: साहित्य ख्यलय् यक्व पासापिं दत खनिं छं ! व नं नांदंपिं त:धंपिंसाहित्यकारपिं । उकिं जिमित ल्व:मन जुइका मखुला?”
वं फरर धया हल । जिं थुइका जिगु लिस: मवया: पासां तस्कं हे नुगलय् स्याकल खनिं।
जिं वैत भतिचा थुइका बिइगु भनं धया
– “अथे मखु…….. झी नेवा:तय् मोहनि हनीगु ख:। दशैंला मखु नि ! उकिं मोहनि नख:या भिन्तुना धालय् , व सकाः बांलाः ।”
– “मोहनि दशैं छु व हे मखुला न्ह्यागुसां नेपा:मितय् त:जिगु नख: झी स्कुल ब्वने बलय् १५न्हू मछि बिदा बिइगु नख: ! छुपात नां हिलां!” व थ:गु हिमिचा:गु भासं वया नुग:खँ प्वंका हल ।
– “स्व पासा! झीसं थ:गु संस्कृति ल्वःमंका छ्वल धाःसा झी मस्तय्‌सं झीगु संस्कृति गथे लुमंकी? ता:ई लिपा , जिं आ: थुयावल, झी नेवा:त धैपिं भ्वाथ:गु कापतं भुना त:गु लुंया असर्फी थें हे का ! तर झी व भ्वाथ:गु काप: जक स्वया च्वनापिं ! उकि दुनेया मूल्यवान चीज उला स्वयेगु च्यूता: मदुपिं झीपिं ! ” जिं थुयाव:गु खँ धयाछ्वया !
– “व भ्वाथ:गु कापः उला स्वयेगु कुत: या:सा झीसं नं झीगु तजिलजि गुलि मूल्यवान धैगु खँ सकसिनं सियावइगु ख:! ” जिं धया । “नेवाःतय् मोहनिबलय् अष्टमीखुन्हु कूछि भ्वय् नइ , नवमी खुन्हू स्याक्वत्याक्व याइ झीगु हे पहलं । अले दशमी खुन्हु चालं क्वकयाः छेंया थकालिं मोहनि सिन्ह: तिका: नला:स्वां छ्यनय् छुइके बिइगु ख: ! तर बिजयादशमी धका: मखु !

– “मदु मदु धेबा त्यासा कयाः दशैंया टीकाया नामय् त्यासा क्वबिइ म्वा: नेवाःतय् , खलाकि मखु !”
– “तर आ:वया: थथे नं मजुल, थौं कन्हयया नेवाःतय् जिं खनाच्वना टीका धाधां मनूत दक्षिणा मुंका जुयाच्वन । थ: लुंया असर्फी धका: म्हमसियाः सिलायबरया ध्यबाया ल्यूने ब्वाँय् जुयाच्वन। थ:गु म्हसीका थ:गु पहिचान मथूपिं नेवा:त खना: जित: अजू चा:।”
जिं पासायात न्यंकाच्वना।
“का का म्वाःल गपाय् हाकःगु लेक्चर बियाच्वनागु । जि जक ला टीका फया जुयाम्ह नेवा: थन ?
छ पिने च्वनाच्वंम्ह जुयाः खँ स: का ! इलं लाइबलय् छ नं थन त्वा: त्वा: पतिं छक: चा:ह्यू वा अले छं थ:म्हं नं थु हे थुइ नि ।” पासाया तं वलला मस्यू , थुलि धयाः वं च्वात्त लाइन हे काटय् यात।
जित: अजू चाल !
वातांहा का जि !
– “चालं क्वकाये त्यल अझ: हे सिमध:निला छं? ” छेंच्वम्हं न्यना हल! चालं क्वकायेत पुजाभ: तयार यानाच्वनाम्ह जि झसंग वन !