ज्यानमारा मल्ता !!

मथुरा सायमि

मचाबले उपो धयाथें जि पाजुपिंथाय् , मरूहितिइ । स्कूल नं अनं हे वनेगु , धुंकाः नं अन हे च्वनेगु । नये , त्वने ,द्यने सकतां अन हे । तःधीपिं अन छेय् अजि , पाजु व मलेजु । मचाम्ह धयाम्ह छम्ह जि हे । भिंचा भाजु । मेपिं सुं मदु ।
स्कूल वंसां ब्वनेगुली उस्त ध्यान मदु । सुयां चिउताः नं मदु । हारांहुरूं भारांभुरूं । खःगु व भिंगु स्वयाः मखुगु व मभिंगु ज्या हे जिगुपाखें उपो जुयाच्वनी । जिं हे चाः ।
पाजुपिन्थाय् च्वंच्वनासां जितः माया यायेगु या हे याः । नये त्वनें नं गबलें मथ्याः । धयाधयागु मखुसां प्वाः मजायक गबलें च्वने म्वाः। न्ह्याबलें मखुसां इलय् ब्यलय् ला नं दुत हः । ला मन्तकि धाःसा न्ह्याक्व नःसां त्वंसां नया थे त्वना थे मच्वनीगु । क्वपुंगु बानि । जिं थःत थ्व हे माल धकाः सुयातं गबलें पिरय् मयाना ।
छेय् तक्खा । क्यब नं तक्कू । पिथा च्वं वनेत क्यब जुकाः वनेमाः । क्यब दथुइ तमागु अजू स्वांमा छमा दु । चिचीफ्वःगु म्हासुगु स्वां ह्वयाच्वनी । थ्वया हे च्वने म्वाः । बॅय् हाःगु स्वां जक मुनेवं द्यः पुज्यायेत गाः । क्यबय् वनेबले अन चखुंचात चिरिचिरि हालाः भुरूभुरू ब्वया च्वंच्वनी । न्ह्यःने वनकि सकलें ह्वाररर ब्वयावनी ।
छकः गय् गय् चखुंचिया ला नये मास्ते वल । अपां कयेकेगु । उमित मलाः । सकलें ब्वया वनी । अले उजुंसुजुं झंगःत अन च्वं वइ मखुत ।
छन्हु मखु थे न्यंक अपां कयेकागु । धाथें छम्ह चखुंचा ला भुगुक्क हे कुतुं वल । भाराभारा सन । ब्वये मफुत । दुररर वनाः ज्वना । भचा फ्यारफ्यार सनाः व जिगु हे ल्हाःती सित । गन सुचुके गन सुचुके । सुनानं खंगु ला मदु । आः थ्वयात कवाफ हे दयेकाः नये । जिगु मन तरंङ्गित जुल ।
चखुंचा म्हिचाय् दुछ्वयाः बैगलय् छकः थाहाॅ वना । नयाः सकलें छझाः आराम कयाच्वंगु न्हिनसिया ई । सुं सां मदु । खनकि ब्वःबी । ला दयेकाः ला नकी हे मखु । आः थम्हं हे दयेके माः । सुं थाहाॅ वइगु भय । उकिं सिलेबरया बातचा छगलय् चिकं भचा लुयाः मसला-मिसला नं तया । मकलय् हेंग्वाः गाक्क तयाः सलाइ नं ज्वनाः जि खुॅ पलाखं कुहाॅ वना । छेली स्वाहनेतःले सुनानं खनी मखु । जि अन हे दुहाॅवना ।
हेंग्वाः च्याकाः फू फू याना । मि ग्वात । बातचा देछुना। चखुंचिया पा पि दक्व पुया । काताकुतु याना । फू फू यायां ला दयेका । भचा जायव ला ग्वाराग्वारा हे दायावल । नस्वाक्क बास नं वल । बुके हे मलाः , नये हथाय् जुल । अन हे च्वनाः पू पू ला नया । क्वॅय् नं मारामुरूं नच्चुक न्ह्ययाः सवाः कया । ला फुत । ति नं त्वना। साः । प्वाः नं बागः हे जाः थे जुयावल ।
” सु हाॅ अन ? ”
मलेजुं थयक स्वःवल । का फुत । जि ला न हे वाय् मफुत । जिल्ल जुयाः मल्जुयात ख्वाः चूलाक तक हे स्वये मछाल । जि सिना थे जुल । चखुंचा स्यानाः नल धकाः अजियात कनाबिल । पाजुं नं सिल । सकसिनं जितः ” अथे नं याये त्यःला काः । गुलि पाप लाइ । नका मतया ला छन्त ? ” धकाः ब्वःबी थे , ग्यां बी थे धायेगु धाल ।
जि म्हुतुपाकः जक जुयाः क्वछुनाः उमिगु खॅ जक न्यनाच्वना ।
मलेजुया तं क्वमलाःनि । व छम्ह पारापारा हालांच्वन , ” द्यः छकः भागि यानाः नयेगु ला गनः गन , झङ्गःपंछि स्यानाः नैगु का अय् । मनू स्याःसां ज्यानमारा , झङ्गःपंछि स्याःसां ज्यानमारा हे । बागःचा , फुच्चा । थ्व ला ज्यानमारा मल्ता जुल का । ज्यानमारा मल्ताचा । पुलिस हयाः ज्वंका छ्वयेगु का आः थ्वैत । ”
क्वछुना च्वनाम्ह जिं थस्वय् हे मफुत !!!