ख्याच्वः !!

मथुरा सायमि

बि.सं. २०३५ साल पाखेया खॅ । जि उबले शान्ति शिक्षा मन्दिर हाइ स्कूलया प्रधान अध्यापक । थॅहिती । माघया २ गतेनिसें S.L.C या परीक्षा न्ह्याइगु । जिगु स्कूलय् थासं मछिं । उकिं अन सेन्टर मकया ।
परीक्षा नियन्त्रक भाजुलिसे जिगु खॅ ब्याः । पिनेपिनेया जिल्लाय् नं परीक्षा बांलाक व सुथांलाक्क न्ह्याकेमाः
धकाः तातुनाः ज्यूज्यूथाय् थनं हे परीक्षा संचालनया लागी मनू छ्वइगु । थ्व ज्याय् जि नं निकःति पिने जिल्लाय् वने धुनागु दु ।
छन्हु परीक्षा-नियन्त्रक भाजुया फोन वल । सगरमाथा अंचलया रूम्जातार धयागु थासय् परीक्षा संचालनार्थ जितः वनेत धाल । न्हूगु थाय् चाःहिले दइगु , न्हून्हूपिं मनूत म्हसीके दइगु। फुक्क सरकारी खर्चय् नये, त्वने , च्वनेया ब्यबस्था जुइगु । नये नं दइगु , थये नं दइगु । जिं म्हाः मधया ।
माःमाःगु ज्वलं फुक्क प्वःचिनाः जितः लःल्हानाः अफिसया गाडिं जितः यरपोर्ट तक्क तःवल । ट्वीन अटरया चिक्चाग्वःगु जहाजं ब्वयाः जि रूम्जातारया यरपोर्टय् थ्यंका । सी.डी.ओ. अफिसं मनूत वयाः जितः काः वयाच्वन । अन हे मेगु छगू परिवारं नं जितः म्हसीकाः खॅ ब्याकः वयाच्वन । जि थ्यंगु — उमित जुजु वल ला , धिराज वल ला थें जुयाच्वन ।
सी. डी.ओ . अफिसया छेय् यन । छकू धुकू क्वथाय् जाॅचया भ्वंभिं दक्व स्वथना । प्रश्नपत्रया ट्रंकय् तालं ग्वयाः नं शीलबन्दी दु । फुक्क जिगु हे संरक्षनय् । शुक्रवाःया दिन । कन्हे शनिवाः कुन्हु जाॅचया लागी फुक्क मिलय् यानाः दक्व सकतां ज्या सिधयकेगु खॅ ब्याका । जितः च्वनेत अनसं छकू क्वथा बिल । च्वनेत छिं । सुचुकुचु दु ।
जितः लसकुस याःवःपिं मध्ये छथ्वः परिवारं जितः त्व हे मत्वःतू । छम्ह बाज्यःतिवंम्ह मनू व वया निम्ह मनू । बहनीया बेलि इमिथाय् हे ब्यबस्था यानागु जुल अले नयेधुनेव जिगु डेरातक्क उमिसं हे तःवयेगु खॅ कन । इच्छा दुगु ला मखु , अयनं उमिसं नुगलय् स्याकी धकाः जिं जिउ याना । पाहाॅकथं उमिसं जितः उमि छेय् ब्वना हे यन । जातं घले जूसां नेवाः भाय् बांलाक ल्हाये सः व । गथे गथे । वं थःगु नां कन—धन बहादुर घले ।
धारमय् द्यः खिउॅ खिउॅ धायावल । थुमि छे नितचा हे जाः खःसां यक्व छिं । छगू रोपनीया जग्गाय् दथुइ छेय् । छेयया न्ह्यःने ल्यूने क्यब । तःताजि सिसाबुसा व स्वां ह्वयाच्वन । क्यब छगुलिं नस्वाः । त्यानुल जुइ धका जितः दुने ब्वनायन । बैठक तक्कू । लिक्कसं किचन । साक्क नस्वाः वयाच्वन । नयनं पित्याःगु हे खत । छपाः देमाय् न्यागःखुगःति ततःग्वःगु सन्त्रासि तयाः जितः न्ह्यचिके हल । खॅ ल्हाल्हां निगःति प्वलाः नया । अले बुरां खॅ पितहल ” सुपारी टेनडेन साबयात हाकिम साब जक धाये न्हे । सहरंझाःम्ह हाकिम साबयात स्वागत याये दयाः भाग्यमानी जुल जिपिं ।”
वं वया कलाःम्ह , म्ह्यायम्ह वया कायचाम्ह अन दुपिं सकसिगुं म्हसीका बिल । कलाःम्ह ल्यासे हे तिनि, म्ह्यायम्ह नच्चाचा अले कायचाम्ह पत्थाचा ।
” हाकिम साबया छेय् काठमाडौंलय् गन हजुर। जिपिं नं यलयापिं हे खः। अन नं छेय् छखा दु । थ्व ला पुर्ख्यौली छेय् जिमिगु । हाकिम साब नं सोझाचा हे खने दु । गुलि बांलाः । परिवार दत ला मदुनि ला? ”
जिं थःगु खॅ कना । ब्याहाः जुइधुंकूगु अले मचा छम्ह नं दयेधुंकूगु खॅ खॅ ब्याका ।
जा बुत । ख्वलाचां देमा चाःतुल । ला हे स्वथी । जाय् नं तुलुतुलु हे घ्यः लू । अचार नं ग्वःता । मरिचरी , फिना-धौ ,सिसाबुसा । तयां तयेथाय् मदु , नयां नये मफु । नये धुनेव दनेत हे थाकुल ।
वये तेल । बुराया अज्जं खॅ ल्हाये सिमधःनि ।
” हजुरयात बिन्ति यायेमागु छता दु ।”
“धैदिसॅ ” जिं धया ।
” छु धायेगु हला । थ्व म्ह्याय् कान्छी । तःधीम्हसिया ज्या-खॅ सिधल । मचा नं छम्ह दत । व यलय् हे । आः थ्व म्ह्याय् रामप्यारी घले । नीन्यादॅ दत । S.L.C छगू पास मजुयाच्वन । जूसा ज्या छगू नं सि हे धयेके मानि । ज्ञानीपिं भिंपिं सहरय् हाकिम साबया सुं पासापिं दु सा धैदीसां जिउ ….। ग्व , नमस्ते याये म्वाःला थन साबयात ” भचा तापालं च्वनाः स्वयाच्वंम्ह म्ह्याययात अबुम्हं न्वात ।
रामप्यारी न्ह्योने वयाः क्वछूवल । मिसाचा स्वयेज्यू । भचा समीनीचा ख्वाः वः । लिबात । लिहाॅ वयेत दना ।
बुरां तछ्यानाः खॅ ल्ह्वत ” हजुरया गुण जनमय् ल्वःमंके मखु । थ्व मचा छम्ह थपाले पास हे यायेमाः । थ्वयागु क्वथाय् थ्व बाबु अखण्डयात हे गार्ड तया बिया दिसॅ । थपाले ला थ्व म्हाय् छम्हसित थमकासे मज्यू हजुर । गुहालि । छपा ल्हातिं मरि बुइमखु नि। झी कन्हे नापलाये । मज्यू ला हजुर ।”
वं जितः नमस्ते यात । लिस्सें कलाःम्हसिनं नं निपा ल्हातिं प्यपुंकल ।
जितः नमस्ते याये ला , मयाये ला जुयाच्वन। नयागु नये नं मफु , नयेधुंगू ल्ह्वये नं मफु !!!