भुतमालि

रमेश मानन्धर
थौं जि तसकं लयता । बाःछिं मल्या धुंकल थौंया दिं पियाः च्वनागु । बाःछि न्ह्यं जिं छक्वः पासायाके भुतमालि ब्वयेके न्हि ले धयां लत्ताइँ छक्वः हे मथीकु लतंचां । व कुन्हु निसें जिं नं जिगु हे लत्ताइँ नं भुतमालि ब्वयेकेगु मनमनं निष्चय यानागु खः । बौयात लत्ताइँ व सुका छगः न्यानाब्यू धायेगु जिगु आंत मरु । थःम्ह न्यायेत ध्यबा मदु । तर नं जि हरेस मनया । थःगु कथं कुतः यानाच्वना । स्कूल छुट्टी जुइवं खुसि सिथया बुइँ जुइमा कर्पिनिगु क्यबःय् जुइमा चेत जूगु भुतमालि मां वनेगु । भुतमालि सिकें जितः माःगु सुका । भचा तःहाकःगु का खनकि हे थःगु ल्हाःया बुरापतिं व सिखापतिंलय् तुलाः कायेगु । जित लत्ताइँ मखु का यक्वः मुंके माःगु दु । छाय्धाःसां लत्ताइँ ला जिं दयेकेधुन । गोल्टिनया लत्ताइँ ! छग गोल्टिनया निखेरं प्वाःखनाः कथि दुछ्वया लत्ताइँ दयेके धुनः । व गोल्टिनया लत्ताइँलय् का जायके माःगु खः ।
थौं जित भुतमालि ब्वयेकेत का नं गाःथें जुल । सुका लानाबले निपाः भुतमालि नं लानाः खाता तःलय् सुचुकाः तयागु नं लिकाना छेँया पल्ली वना । छपाः भुतमालि लत्ताइँलय् चिनाः, छपाः पलिया पःखालय् बापा अप्पां ल्हाका तया । तःक्वःमछिया कुतःसितिं मवनं । भुतमालि आक्सय् ब्वलः । जिगु नुगःनं लसतां भुतमालि सिकें अप्वः च्वये च्वये ब्वयाच्वन । १० मिनेत ति मज्जां भुतमालि ब्वयेके धुनः जुइ । भुतमालिं नं जिगु नुगःया लसतायात थी त सर्गतय च्वय् च्वय् ब्वया वनाच्वन । जिं नं लसतां सुका त्वःता च्वना । थुस्स्स…… ! भुतमालि चेत ! सुं नापं भुतमालि मल्वाःसां आक्सय् ब्वयाच्वंगु भुतमालि फाँन्ता फुंन्तु थःगु हे तालं ब्वया वन । छाय् धाःसां व भुतमालिया सुका च्वः जिगु ल्हातय् मन्त । जिगु लत्ताइँलय् मन्त । जि सुका लत्ताइँलय् तुला ला तया । तर सुकाया च्वःयात लत्ताइँलय् ची ल्वमनं जुइ जिं । जि वाल्ल जुया गुबलें आक्सय् थःयःथे ब्वयाच्वंगु भुतमालि छक्वः स्वयेगु । छक्वः ल्हातय् च्वंगु लत्ताइँ यात स्वयेगु । लत्ताइँ आः नाँगा जुया थःगु असली रुप गोल्टिन जक जुइधुंकल । ल्हातय् च्वंगु गोल्टिन अले पःखालय् फिरफिर सनाच्वंगु छपा भुतमालिं जित हिस्याना च्वंथे ताल । जि न्हिले नं मफु, ख्वय् नं मफु !