तीर्थयात्राय् ला-कीचा छम्ह !!

मथुरा सायमि

जितः मचाबलेनिसें ला-कीचा धाइगु ।
बानि स्यंगु ह्याॅउ-मचाबलेनिसें । जा बांलाक मनः धका लाया ति भचाभचा लुयाः जाप्यय् म्हुतुइ ल्वसुकाबीगु। छप्ययचा जाय् छकूचा ला खनेदयक तयेमाःगु । अले स्वारास्वारां नइगु खनी जिं
। ला मन्तकि जा हे नइगु मखु खनी । नकूसा फूफू यानाः ल्ह्वयाहइगु खनी । मखयक धाल खइमखु ।
थ्व बानि लिपालिपा तक्कं घाना हे च्वन। लिपा धयागु छु , आःतक्कं थाना हे च्वन । ला छकू मदयक ला गा हे मगाः । ला मन्तकि जा नयेगु हे पाः जुइ । ला मदइथाय् उकिं जि भ्वय् नं मवना । फ्रीजय् ला गबलें प्वनी मखु । छकूचां सां गाः बरू ।यकादशी गबले , द्वादशी गबले । सियाच्वनीगु हे मखु ।
नव, त्वन,द्यन । स्कूल कलेज वन । गनं चाःह्यूवने धयागु बानि मदु । देश बिदेश नं मथ्यं। । ह्वःताः नं चूमलाः । भाग्य हे मदुगु धाये ला । तापाक्क मखुसां कमसेकम ससतीथाय् छथाय् निथाय् ला वनातय् माःगु हे खः।
छन्हु सन्ध्या टाइम्सय् तीर्थ यात्रा वनेगुया बिज्ञापन छगू वैच्वन ।बिसं.2065 सालया खॅ । बौध्द चारधाम तीर्थ यात्रा । 14 दिनं नेपाः लिथ्यनीगु धयातल । अहो! थुकी जक वंसां नेपाःया लुम्बिनी व भारतया थाय् थासय् नं थ्यनी छकः वने हे मालकि छु ?
मुंकूपिं यलया युवक बौध्द मण्डल । तिकत काः वना । ब्यबस्थापक सुरेन्द्र शाक्य भाजु । म्हस्यू धाल दः । माःमाःगु हलंज्वलं मुनाः जि नं बौध्द चारधामया तीर्थयात्राय् प्रस्थान याना। 32म्ह मनू अले लासाफांगा , भुतूभातू तःबले बस जाल ।
चारधाम धका गौतम बुद्ध बूगु थाय् लुम्बिनी , बुध्दत्व प्राप्त यागु थाय् बुध्दगया , ज्ञान प्रबचन यागु थाय् सारनाथ अले महापरिनिर्वाण जुया बिज्यागु थाय् कुशि नगर । फुक्कबनं चाहिला । सकसियांलिसे म्हस्यूतास्यू याना । यक्व थाय् बाय् सीका। न्ह्यैपुल ।
यात्राजःछि धया थे नयेतेलकि धाःसा जि थुस्स ।च्वनेगु बिहार बिहारय् । जा थुया नयेगुं अन हे । भोजन शाकाहारी । मयोगु छता थ्व हे जुल दक्कय् ।
थुइगु ययोथे ।गबलें झ्वान्तां पान्तां , गबलें चिन्वः , गबलें छु ।साःसां व हे , मसाःसां व हे । मनसे गाःगु मखुत । ला छता दुगुसा गुलि जिउगु । बिहारय् ला दुत हये मज्यू धाल । ला नकाच्वनां भाय् मल्हाः धाल । बागः प्वाः जक थनाः जि सुकू हे गन ।
खॅ ब्याःम्ह पासा छम्हलिसे छन्हु सॅ हाःहू धायवं बिहारं बेपत्ता जुया । पिने होतलय् निम्हसिनं ला जा त्यंक नया । मखु थे न्यंक अले पुचलय् च्वं वया । देनाथाय् पासां ग्याःचिकु पहलं धाल ,” सायमि सर , इश्वरं झीत सहः याइ मखु कि छु ? झीसं ला नं नया वया । फताहा खॅ नं ल्हाना । पाप लाइगु जुलकि छु झीत ?
जिं धया, ” पाप मखु , धर्म लाइ झीत । भगबान झी खनाः लयताइ छायधाःसा झीसं थःगु आत्म-इच्यायात मस्याना । आत्मघात मयाना । यातकि जकं पाप लाइ। आत्मां सराः बी । आत्मा हे भगवान खः । अले भगवान झीगु आत्मा ।”
जिगु खॅ न्यनाः पासां म्हुतुइ धौ फित !!!