नयमाःसिंत …!!

मथुरा सायमि

पकनाःजः कम्पुकोतयच्वंगु नेपाल युवक माध्यमिक शिक्षालय जिमिसं जिमिसं हे स्वनागु खः । जग्गा व छेय् स्कूलयात कायेगु ज्याय् छपुचः जिपिं अनया हे संस्थापक शिक्षकत खः । प्रधान अध्यापक जूम्ह तीर्थ गुर्जु अले सचिब जुम्ह भाजु महेश्वर जुजु । थ्व बिसं. 2022 साल पाखेया खॅ ।

शनिबाःजूसां जिपिं अन स्कूलय् थ्यं । गबलें मितिङ् , गबलें सितिङ्। न्हिच्छि न्ह्यान्ह्यापिनि न्ह्यान्ह्यागु ज्या याना न्हि छ्यायेगु । गुलिं सफू-धुकुती दुस्वइ । गुलिं तेबिल तेनिस म्हितीसा, गुलि बाडमिंतन । छपुचः तास म्हिती । सुयां न्हिवं मचाः ।

सकलें च्याम्हगुम्हं छपु हे लॅपुं लिहाॅ वये । छत्रपातिइ थ्यनी । अन थकालितसें जा नयेगु होतल छगू चायेकातःगु दु । सकसियां पित्याय् धुंकी ।सकलें अन हे दुहाॅवनाः नये । प्लेत सिस्तम मखु । त्यंक नयेगु , नकीगु । जिपिं वनकि व होतलय् भ्वय् न्यागु थे च्वनी । राउन्द तेबिलय् छचालिं च्वना जा नये । छेय् याकःबकःया नयेगु स्वया पुचलय् नाप्पं नयबले मसागु नं साः थे च्वनीगु अले नये नं भचा उप्वः हे नये फइगु जुयाच्वन ।
पुचलय् तीर्थ गुर्जु , महेश्वर बर्मू , अमृतलाल , केशर बहादुर, केशरबीर , सुशील , नारायण दास , मुकुन्द दास , कालिदास , नारायण देबी , बिद्या अले छम्ह जि हे नं खत । सकलें नसिंगुलुत ।
छकः ।
सकलें च्याम्हति हे दु नयाच्वनापिं । भुतंखापिं । स्कूलय् ब्वंकीपिं माष्तरत हे धाये मल्वः । लिसा तयेहक्व चत् । न्ह्यागुं द्वॅद्वॅ नयेफुपिं। व माल , थ्व माल धका फ्वनी । छम्हसित छु तयेहल , फुक्कस्यां ख्वल्चा फयाकाइ । न्ह्याक्व तयेहःसां मगाः। गुर्जुया पल्तन, गो पल्तन , हक्वहक्व चत् । प्वाथय् नं गन जक तइगु खः , गुलि जक न्ह्यंगु खः। तन्न धुस्स जुइ धुंकल । अयनं पासापिसं लिसा कया हे च्वनतिनि । होतल थुवाःया ख्वये ला न्हिले ला। मछाःपिं सुं मखु , सितिकं नयेमागु मदु धाये थे ।

धक्काःततं सकलें दन । ल्हाःल्ही सिला ग्वय् सुकुमेल म्हुतुइ तल । धिबा पुला च्वनाबले थुवाः नं ल्हाः निपां प्यपुंका जिमिके बिन्ति यात ,” हजुरहरूलाई यौता कुरा बिन्ति गरूं ? ”
” के कुरा भन्नुस् न साहुजी ।”
” भोलीदेखि हजुरहरू मेरोमा नआउनुस् है । बिन्ति । अन्तै पाल्नु होला ।”
हाॅइइइ ? !!!