सीम्ह हिरो !!

•••••••••• गय् गय् जुया प्याखंया अन्त्यय् वयात स्यानाबी । व सिना वनी । सिथं हे यनी । सनाःवंपिं नं ग्वाःग्वाः । दः ख्वयेवल । जि यःम्ह हिरोयात स्याना हे बिल । जितः नया थे मच्वन , त्वना थे मच्वन ।    ••••••••••••                                                          °°°°°°°°°°°°°°°

मथुरा सायमि

ल्यायम्ह ल्यासेतय् जक मखु ; मचाखाचातय् नं थः यःगु धयागु दइ ।यःगु नं गुलिसियां छता जक जूसा गुलिसियां निता स्वता नं । गुलिं बांलाःगु भिंगु , गुलिं बांमलाःगु मभिंगु ।
जिगु थःगु हे खॅ ल्हाये धासां यक्व दु । थन थौ छता हे जक कने । जितः यःगु धैगु प्याखं स्वयेगु । चान्हय् चच्छिचच्छिं न्ह्यो पाः जुइक त्वालय् त्वालय् वना दबू प्याखं स्वयेलं । बेखाचिया प्याखं धालकि हुरूक्क हे । थ्व जुल दबू प्याखं ।
नेपालय् सिनेमा हल दसेंलि फिलिम स्वयेगुली जिगु ध्यान क्वस्यूवन । जन सेवा सिनेमा हलय् वक्व फिल्म स्वया । गुगुं गुगुं ला निकः स्वकः स्वःवना ।
धिबा सिसिककः। दकय् दंगु तिकतया नीन्यागः धिबा । 25 पैसा । कमिजया पातापाता छखेलाक्क हुलमुलय् लाइनय् च्वना तिकत कायेमाः । छथाय् तिकत काये मफुसा काचकाचां मेगु हलय् ब्वांवने । रञ्जना दु । श्रीहल दु । बिश्व ज्योति दु । मुन लाइट दु । प्रभा हल नं दु । छुं धन्दा मदु ।                               
मचाबले हिन्दी भाय् बांलाक मथू । स्वस्वं थुयावल । उवलेया हिरो हिरोइनत सकलें धैथें बांलाः । ग्वाल्ल हिरोत मध्ये दः दकलय् सकलय् यःम्ह धयाम्ह दिलिप कुमार हे खः । न्ह्यागु वसतय् नं ल्वः । म्ये हालेगु , प्याखं हुलेगु , सल ब्वाकेगु , तलवार ल्वाकेगु , ल्वायेगु न्ह्यागु याना क्यंसां बांलाः। वं भिलियनयात दाइबले गबलें थम्हं नं ल्हाः ल्ह्वनाच्वनी । उकिं वया फिलिम जिं गबलें मत्वःता ।जि मचाबलेयाम्ह फेभरेट हिरो ।
छन्हु । ” शहिद ” फिल्म क्यन । उकी नं हीरो व हे । गय् गय् जुया प्याखंया अन्त्यय् वयात स्यानाबी । व सिना वनी । सिथं हे यनी । सनाःवंपिं नं ग्वाःग्वाः । दः ख्वयेवल । जि यःम्ह हिरोयात स्याना हे बिल । जितः नया थे मच्वन , त्वना थे मच्वन ।           
थ्वयां भचा लिपा हानं छगू मेगु फिल्म वल । उकी नं हिरो दिलिप कुमार हे । जि ज्यः जुल — सी धुंकूम्ह मनू हानं म्वानावल । सी धुंकूपिं हानं म्वाना वये फैला ? गय् म्वानावल ??
जिगु न्ह्यपुं ज्या मबिल !!!