इन्कलाब ..जिन्दाबाद !!

मथुरा सायमि” इन्कलाब जिन्दाबाद धका हाला जुइमते ।” माम्हं जितः तःक्वः न्वाये धुंकल। व धागु छु जिं मस्यू । जिं मथू । न्यना ” धालकि छु जुइ माॅ ?”
वं धाल,”धायेमते धालकि सुंक च्वॅ रे । अथे धयाजूपिन्त मखंला पुलिसं ज्वनायंकूगु। छन्त नं ज्वना यंकी। कोरां कि कोरां दाइ। पुलिस खना मग्याला छ ? ”
मांया खॅ न्यना धात्थें जि ग्यात । पुलिस खनकि हे थारा न्हुइगु जुल । मांया बिरूध्दय् जिं तिरिक्क नवाये मफुत । ख्यागुलिं ग्यागु ।
उकिं हालाहिला मजुया । नुगलय् चितासू मलू । मनय् खॅ ल्हानाच्वनी — धयां छु जुइ । पुलिसं तायेक धाये मखुका बरू। मतासा गय् ज्वना यनी । जिगु नुगलय् बिद्रोह जुयाच्वन । मचाबले । नेपालय् जन-आन्दोलन न्ह्यानाच्वंगु ई । प्रजातन्त्रया नसंचाय् ।
छथ्वः सजग जनतां सरकारया दमनया बिरूध्दय् सः थ्वयेकल । झण्डा ब्वयेकाः जुलुस पिकाल । देशय् आन्दोलन न्ह्यात । न्ह्योने पिलूवःपिं दक्वसित ज्वन। भाषा, साहित्य , संस्कृति थकायेमाः धापिन्तं ज्वन । गुलिसितं कुन । गुलिसितं यखाना स्यात। गुलिसितं तुपःचां कयेका हिया खुसि-बाः हल ।
मामं बियातःगु मन्त्रयात जन्तर याना क्वखाना जुइ जितः मयल । नुगलय् चितासू मलुल । सर्गः थ्वक्क हाले मास्तेवल । मफु । नःसां नयाथे मच्वन । द्यंसां देनाथे मच्वन । छु याये गुगु याये । ग्या नं ग्याः । दुररर छेली कुहाॅ वना । प्यकुनय् याकःचा पारापारां हालाच्वना , ” इन्कलाब जिन्दाबाद : इन्कलाब जिन्दाबाद ….! ”
बल्ल जितः म्वानाथे च्वन !!!