धिम्निगः धिबा !!

मथुरा सायमि

मरुइ महाद्यः पार्बती छेय् ल्यूनेसं जिमिगु स्कूल । छेली गुरूबाःपिनिगु अफिस । अन हे लिक्कसं नसात्वॅसाया पसः । आलु कवाफ , चाना , चतांमरि अले वः छुइगु नं याः अन ।
हाफ टाइम जुलकि पसलय् न्ह्याबलें मनूत मो मो । फ्यतुइत थाय् दइमखु । आलु कवाफ गुलिसिनं लपतय् प्वःचिना यनी । गुलिसिनं अन हे दनाः सिंकां तियाः नइ । लप्ते थाःगु ति नं फ्यत्तुफ्यइ । चाना निगःचा द्यःने तया चतांमरि छपाया धिब्छगः । धिबा छगः। धिम्निगःवंगु चतांमरी चाना व आलु भचा नं तया छुनाबी । प्वाः हे जाः ।
थौकन्हे थे मस्तयत उबले तिफिन बक्सय् ताकातुकु नयेगु तया बियाछ्वयेगु चलन मदु । न्हिनय् खाजा नयेभनं धिबा छगः कि निगः बियाछ्वइ । गबलें बी नं मखु । धिबा छगः जक जूसां गाः। निगः दु सा झं फुर्ति हे मेगु । थ्व बि.सं. २००२ सालपाखेया खॅ ।
छन्हु ।
मामं जितः धिम्निगःवंगु ध्याग छगः ज्वंकाछ्वःगु । म्हिचाय् बांलाक हे स्वथना यनागु । हाफटाइम जुइव निगः धिबाया थः यःयःगु कयाः नया । धिबा बीत स्वया । म्हिचाय् धिबा मदु । गन कुतुंवन धका फुक्कबनं माला । गनं मलू । पसल्या तंचाल । पत्याः मजू । यायेगु छु , नयागु प्वाथय् थ्यने धुंकल । ल्ह्वकाकाये ज्यूगु मखुत ।
स्कूलं त्वःतूगु इलय् लुखायसं च्वना साहुजीं जितः पसः दुने ब्वनायन । म्हय् वात्तुवाल । धिबा मदु ।साहु तंचाया ” का , कत्तु हे त्वकाछ्व थ्वैगु ” धाल। धात्थें कत्तु त्वकी धका जि ग्यात । प्याॅयक हे ख्वयाबिया । कलाम्हसिनं ” का का म्वाल , ख्वयेगु मखु थन । कन्हे वयेसातं धिबा ब्यु ” धका जिगु किताब- कापी दक्वं लाकाकाल ।
जि सुकुसुकु ख्वख्वं लिहाॅ वया । आः धिम्निगः धिबा गन काः वनेगु ? धिम्निगः धिबा !!!