कोरोनाको हटस्पट काठमाडौंमा छैन निशेधाज्ञा ,बाहिर ३९ जिल्लामा पूर्ण तथा आंशिक निषेधाज्ञा जारी

काठमाडौँ / कोरोना महामारीको जोखिम बढ्दै गएपछि स्थानीय प्रशासन तथा स्थानीय तहले आवश्यकताको आधारमा ३९ जिल्लामा पूर्ण तथा आंशिक रुपमा निषेधाज्ञा भएको गृह मन्त्रालयले जनाएको छ । लकडाउन खोलिएसँगै देशभर कोरोना संक्रमण ह्वात्तै बढेको छ । यसलाई नियन्त्रणमा लिन ,थप फैलन नदिन यसरी स्थानीय प्रशासन तथा स्थानीय तहले पूर्ण तथा आंशिक लकडाउन गरेका हुन् ।
गृह मन्त्रालयका सहसचिव एवम् प्रवक्ता चक्रबहादुर बुढाले ३९ जिल्लामा फरक फरक प्रकारले निषेधाज्ञा जारी गरिएको बताए । जिल्लामै सङ्क्रमण रोकथाम तथा नियन्त्रणका लागि कतै जिल्ला प्रशासन कार्यालयबाटै सूचना जारी भएर निषेधाज्ञा लगाइएको छ भने अधिकांश स्थानीय तहले आफूले स्वतःस्फूर्त रुपमा लकडाउन गरेका छन् ।

उनका अनुसार सोमबार दिउँसोसम्म ३९ जिल्लामा आंशिक तथा पूर्ण रुपमा निषेधाज्ञा जारी भएका छन् । २८ जिल्लामा स्थानीय प्रशासनले सङ्क्रामक रोग नियन्त्रण ऐनअनुसार निषेधाज्ञा जारी गरिएको उनले बताए । पर्सा, सप्तरी, बाँके, बारा, सुनसरी, सर्लाही, स्याङ्जा, बर्दिया, रौतहट, कपिलवस्तु, दोलखा, नवलपरासी पश्चिम, सिन्धुपाल्चोक, गोरखा, रामेछापमा जिल्लाभरि नै लागू हुने गरी निषेधाज्ञा जारी भएको छ ।
यसैगरी चितवन, पाल्पा, सुर्खेत, धनकुटा, उदयपुर, तनहुँ, पश्चिम रुकुम, धादिङ, मकवानपुर, कञ्चनपुर, झापा, दार्चुला, मोरङ, बझाङ, जुम्ला, सिराहा, महोत्तरी, धनुषा, काभ्रेपलाञ्चोकमा आंशिक रुपमा लकडाउन रहेको छ । त्यो क्रम निरन्तर रुपमा बढिरहेको प्रवक्ता बुढाले बताएका छन् । आफ्नो स्थानीय तहमा जोखिमको आधारमा स्थानीय तहले निषेधाज्ञाको फरक फरक शैली अपनाएका छन् ।

तर सबैभन्दा जोखिम मानिएको कोरोनाको नयाँ हटस्पटको रुपमा विकास भएको देशको संघीय राजधानी काठमाडौँ उपत्यकामा भने निषेधाज्ञा जारी गरिएको छैन । रेस्टुरेन्ट, सैलुन र जिमखाना पूर्ण रूपमा बन्द गरिएका छन् । उपत्यकाभित्र १३ वटा समूहले निगरानी र अमुगमनमा राखिएको छ । आवश्यकता हेरेर स्थानीय प्रशासनले काठमाडौँ उपत्यकामा थप कडाइ गर्न सक्ने प्रवक्ता बुढाले बताए । तर उपत्यकाका मेयरहरुले भने लकडाउन गर्ने सोच बनाएको देखिंदैन । सबैले संघीय सरकारकै इशारा पर्खेर बसेको अनुभूति गरिएको छ ।