स्वयम्भू महाचैत्य परिसरमा भाद्र १५ गतेसम्म प्रवेशमा रोक

   हिसि ज्यापु                                                                  काठमाडौं / स्वयम्भू महाचैत्य परिसर आगामि भाद्र १५ गतेसम्मका लागि बन्द गरिएको छ ।
विश्व सम्पदा क्षेत्रको रूपमा रहेको काठमाडौंका महत्त्वपूर्ण बौद्ध तीर्थ स्थलमध्ये एक रहेको उपत्यकाको आस्थाको केन्द्रको रूपमा परिचित स्वयम्भू महाचैत्य परिसर कोरोना संक्रमण हुने भयका कारण यसरी बन्द गरिएको हो । यो समय गुंला पर्व चलिरहेको छ । काठमाडौंका विभिन्न भागबाट गुंला पर्वको एक महिना यहाँ बिहानैदेखि बाजागाजा सहित यस चैत्यमा मेला भर्न आउने प्रचलन रहेको छ ।।
काठमाडौंमा कोरोना संक्रमण बढ्दै गएपछि जिल्ला प्रशासन कार्यालय काठमाडौंले जारी गरेको सूचना अनुसार भीडभाड गरेर धार्मिक सांस्कृतिक पर्व मनाउन समेत निशेध गरे लगत्तै यस्तो कुरा बाहिर आएको छ । काठमाडौं महानगर पालिकाका प्रवक्ता एवं वडा नं १५ का वडा अध्यक्ष ईश्वरमान डंगोलले यसरी स्वयम्भू महाचैत्य परिसर बन्द हुने बारे जानकारी गराएका छन् । उनका अनुसार त्यहीँको बुद्धाचार्य परिवारको स्वयम्भूमा हुने नित्य पूजा र अन्य गर्नैपर्ने पूजा बाहेक सर्ववसाधारणको  प्रवेशमा समेत रोक लगाइएको छ ।
यसैबीच हिजो कामपा १५ वडा कार्यालय, स्वयम्भू व्यवस्थापन तथा संरक्षण महासमिति , बुद्धाचार्य पुजारी परिवार,स्वयम्भू क्लब तथा महानगरीय प्रहरी वृत्त स्वयम्भूको एक बैठकले यसरी स्वयम्भू परिसर सर्वसाधारणको लागि बन्द गर्ने निर्णय गरे अनुसार स्वयम्भू महाचैत्य परिसर भाद्र १५ गतेसम्मका निम्ति बन्द गरिएको पनि प्रवक्ता डंगोलले जानकारी गराए ।                    “सर्वसाधारणलाई महाचैत्य परिसरमा प्रवेशमा रोक लगाइए पनि हामी स्वयम्भू महाचैत्य र यहाँ रहेका पाँच पूर तथा हारती मांको नित्य पूजा भने परम्परागत तरीकाले गरिनैं रहनेछौं । ” बुद्धाचार्य परिवारका एक युवा सदस्य चन्द्र बुद्धाचार्यले बताए ।
” स्वयम्भूमा हाम्रो पुर्खौंदेखि गरिआएको परम्परालाई हामी निरन्तरता दिन्छौं । तर श्रद्धालु उपासक उपासिकाको भीडका कारण कोरोना संक्रमण जोखिम हुन सक्ने संभावना रहेको  हुँदा प्रवेशमा रोक लगाउन यतिबेला हामी बाध्य भएका छौं!” अर्का युवा सरोज बुद्धाचार्यले बताए ।