त्रास

सुधीर ख्वबि
द्यनाच्वंम्ह आसनारां वाथाइथां दन । इलचंय् मिखा ब्वल । नकतिनि सुथसिया न्याता: ई तिनि जूगु । पिने लँय् बुलडोजर ह:गु थें सबत तायेदत । आत्तेचाया झ्या: चायेका स्वल । एस्काभेटर छग: व बुलडोजर छग: तापाक्कं वयाच्वंगु खन । वया म्हय् हंशं त्वता:वनला धैथें जुल । वं काचाकाचां लक्ष्मीमायायात थन – ‘बुलडोजर हल, बुल्डोजर हल याकनं दं।’ लक्ष्मीमाया नं आत्तेचाया दन । नापं द्यनाच्वंपिं निम्ह मस्त छ्म्ह छ्म्ह ब्वहलय् पाछाना स्वाहानें घ्वारर कुहाँवन । मूलुखा घ्वाराक्क चायेका पिने पिहाँवन, आसनारां ला। तर हथासं जुया नं ग्यानां न जुइ लक्ष्मीमाया मूलुखा पिने घोस्याक्क भ्वसूवन । नापं मचानं बँय् चतावा:वन ।
उबले लाक्क हे एस्काभेटर व बुल्डोजर छेँ न्ह्यने थ्यंक:वल । बँय् ग्व:तुला ख्वयाच्वंम्ह मचा काचाक्क बुया दुरुरुरु छेँपाखें तापाक्क वन । इमिसं मिखातिसित । थौंनं निसें सुकुम्बासी जुइगु पक्का जुल धका बिचा: यात। छुं ई न्ह्य: स्वीन्यान्हुया दुने थ:पिन्सं हे छेँ थुनाछ्व मखुसा, जबरजस्ति यायेगु जुइ धका उपत्यका सडक बिकास प्राधिकरणया मनूत छ्पुच: प्रहरी ब्वना व:गु नं लछि दयेधुंकुगु जुयाच्वन । दतंफतं व हे छखा छेँ । मेगु छेँ नं मदु । बुँ नं मदु । इमिगु नुगलय् धौबजी वालाच्वंच्वं हे एस्काभेटर व बुलडोजर थ:गु लँय् न्ह्याँवन । बुलुहुँ छेँपाखें तापाना वन । मस्त ला ख्व:गु ख्वलं तिनि । इपिं निम्हेसियाँ नुग:भाराभारा मिंगु मिनाच्वन गबायति । ‘धत्तेरिका ! बेमान बुल्डोजरचां गपायेसकं ख्या:गु का ।’- आसनारां छातिइ ल्हा: उसिउसि यायां झसूका तल । लक्ष्मीमायां छुं न्वमवा: । व उसिंउसिं झ्यातु पला: छिना छेँय् दुहाँवन । लँय् यक्व मनूया पला: खनेमदु नि । सुथया पला: फाट्ट फुट्ट छपला:निपला:खने दु । प्यका लँय् प्रहरीत च्वनाच्वंगु दु । गाडी निग: प्यंग: बेतोडं ब्वाँय् जुयाच्वंगु दु, इमि अबुया लँ भा:पिना । आसनारां इमित: छ्क: मिखा ब्वया छेँय् दुसुत । ता:ई दयेधुंकल । आसनारां थथे त्रासय् म्वानाच्वंगु । मेहेनत खना भतिचा हे ग्याचिकु मदुम्ह व, सतकय् गनं डोजर वा एस्काभेटर खन कि वयात पीर जुइगु । सडक विस्तार वयागु लागि छ्यँफुसय् यखानात:गु तरवार जुयाच्वंगु दु । जिन्दगी त्रास दुने इत:मित: कनाच्वंगु दु । वं मस्यू गुखुन्हु व तरवारं वयात सुकुम्बासी याना पाला: थकी । थ्व त्रास दुने वं सास: ल्हानाच्वंगु दु । थ: मचातयेगु भविष्य मालाच्वंगु दु । थ:गु पहिचानया च्यूता: कयाच्वंगु दु तर निरीह जुया । गरिव जुया । सुयांगु ग्वाहाली मदया । सायद स्वनिग:या नेवा: जुया !
– यल