भोकको प्रश्न

सुधीर ख्वबि 
भ्रष्टाचारको भोक
कति अरब खरब
ज्युनार गरिसकेपछी मेटिन्छ ?
सत्ताको भोक
कतिपटक सत्तारोहण पछी
टन्न अघाउँछ ?
छिमेकीको भोक
कति हेक्टर माटो मिचेपछी
सन्तुष्ट हुन्छ होला !
महामारीको भोक
कति समय हरेपछी
शान्त हुने होला !
पेटको भोक
आफ्नै घरभित्र कैद छ
ओहोरदोहोर छ संकट बाटोमा।
महामारीको परिभाषा
कति लासको गन्तिपछी
लेखिन्छ होला ?
भोकाएको मृत्यु
घर घर चहार्दै छ
बजाउँदै घन्टी ।
यतिखेर भोकसित
महाभारत रच्न समय आफै
भोकै बसेको छ ।
र सोधिनै रहेको छ
एउटा यक्ष प्रश्न
सबैले सबैलाई ।
भ्रष्टाचारको भोक
कति अरब खरब
ज्युनार गरिसकेपछी मेटिन्छ ?