विदेशबाट फर्केकाको तथ्यांक काठमाडौं महानगरले संकलन गर्ने

काठमाडौं/ विदेशबाट फर्केर काठमाडौंमा बसेकाहरुको तथ्यांक महानगर पालिकाले संकलन गर्ने भएको छ । विश्वमा कोरोनाको महामारी फैलिएको बेला यसरी वैदेशिक रोजगार र अन्य कार्यका निम्ति विदेश गइ फर्केकाहरुमा संक्रमण भएको पाइएपछि संक्रमण न्यूनीकरण गर्न तथ्यांक राखी आवश्यक कार्य अगाडि बढाउन यसरी तथ्यांक राख्न थालिएको हो ।
“गएको फागुन १८ गतेपछि काठमाडौं आएका र काठमाडौंमै नियमित बसोबास गरिरहेका यात्रुहरुको विवरण संकलन गर्न थालिएको महानगरका प्रमुख बिद्यासुन्दर शाक्यले बताएका छन् । यस क्रममा बिदेशबाट काठमाडौं आएर अस्थायी रुपका केही दिन मात्र बस्ने व्यक्तिहरुको पनि बिववरण लिन प्रयास गर्ने पनि उनले बताए ।
विदेश भ्रमण गरी मार्च १, २०२० (२०७६ फागुन १८) देखि हालसम्म वडामा वसोवास गर्दै आएका नागरिकको अभिलेख तयार गर्न र उनीहरु के–कस्तो अवस्थामा बसेका छन् सो को विवरण सहित लगत तयार गरी पठाउन वडा कार्यालयलाई आग्रह गरेको बताउँदौ यसप्रकारको विवरण खोजी गर्न प्रशासन बिभागले वडा कार्यालयहरुलाई पत्राचार गरिसकेको उनले जानकारी दिए ।
कोरोना (कोभिड-१९) नियन्त्रण तथा रोकथामका लागि सरकारले लकडाउन गरेपछि काठमाडौं महानगरवासीको जनजीवनमा पनि निकै प्रभाव परेको छ । यसलाई सकेसम्म सहज बनाउन प्रयास गरिरहेको पनि उनले बताए
महानगरपालिकाले नगरकार्यपालिकाको चैत ६ गतेको विषेश बैठकबाट १० करोड रुपैयाँको कोष स्थापना गरेर कोभिड-१९ रोकथाम र नियन्त्रणको काममा तत्काल खर्च गर्ने गरी साना, मझौला र ठूला वडा कार्यालयलाई क्रमश २, ३ र ४ लाख रुपैयाँ निकासा पठाइसकेको छ ।