धरानय् थनिनिसें य:मरि महोत्सव जुइगु

धरान/ नेवा:तय् तधंगु बस्ती दुगु पूर्वी नेपालया नगर धरानय् थनिनिसें य:मरि महोत्सव न्ह्यायेत्यंगु दु ।
नेवा: देय् दबू धरान उपमहानगर समितिया ग्वसालय् पुस ९ गतेनिसें १२ गते तक प्यन्हुयंकं थ्व महोत्सव थनया छाताचोकय् जुइ ।
ग्वसा:खल:या नाय: मनोहर शाक्यं जानकारी बियादीकथं पुस ९ गते बुधबा: प्रदेश नं १ या सभासद चन्द्र प्रसाद श्रेष्ठया मूपाहांसुइ उलेज्या जुइ धा:सा १२ गते धरान उपमहानगर पालिकाया मेयर तिलक राईया मूपाहांसुइ समापन ज्याझ्व: जुइ ।
ज्याझ्व: धल: कथं न्हापांगु न्हि उद्घाटन सत्र व नेवा: सांस्कृतिक ज्याझ्व: , निन्हुखुन्हु बहुजातीय सांस्कृतिक ज्याझ्व: व घिन्तांघिसी, दाफा मे लिसें लाखय् प्याखं  , स्वन्हुखुन्हु सांगीतिक कलाकारतय् ब्वज्या , ४न्हु खुन्हु साँस्कृतिक व राष्ट्रिय स्तरया कलाकारतय् ब्वज्या लिसें समापन जुइ ।
“संस्कार संस्कृति छगू पुस्तां मेगु पुस्तायात बियावनेमा: व ज्या थज्यागु महोत्सवंं याइ । नेपा:गालं पिनेच्वंपिं नेवा:त छगु हे कथं न्ह्या:वने मफुत धा:सा पिनेच्वंपिं नेवा:तय्गु संस्कार संस्कृति तनावनी । उकिं पिने च्वंपिं नेवा:तयसं नं भाषा संस्कार संस्कृति मनय् तया तयेमा: ।नीतिगत रुपं हे पूर्व मेचीनिसें पश्चिम महाकाली तक नेवा: जागरण अभियान कृयाशील जुयाच्वनेमा: । झीसं थ:गु हैसियतलिसें संस्कृति नापं भावनात्मक स्वापू बल्लाका: येंकेमा: ।” ग्वसा:खल: नेवा: देय् दबू धरानया नाय: मनोहर शाक्यं कनादी ” थ्वथेंज्यागु महोत्सवंं छगू पुस्तां मेगु पुस्तायात संस्कृति व लजगा नं हस्तान्तरण यानायेंकेगु खँय् ग्वहाली जुइ ” वयक:या नुग:खँ दु ।
थुकथं पूर्वय् जुत्यंगु थ्व य:मरि नखलं स्वनिगलं पिने देशय् नेवा:तयं बांलागु उपस्थित क्यनेफैगु आशा काये फु ।