रेडियो नेपाल अनलाइन डट कमको सम्पादकमा दाहाल

काठमाडौँ/  रेडियो नेपालको अनलाइन न्युज पोर्टल रेडियो नेपाल अनलाइन डट कमको सम्पादकमा मुख्य संवाददाता प्रमोदकुमार सिंह (दाहाल) नियुक्त हुनुभएको छ । तीन दशकभन्दा लामो समयदेखि नेपाली पत्रकारिता क्षेत्रमा सक्रिय दाहाललाई अनलाइन न्युज पोर्टलको सम्पादक भएर काम गर्ने जिम्मेवारी दितोकिएको हो ।
रेडियो नेपालको व्यवस्थापन बैठकले गरेको निर्णयअनुसार रेडियो नेपालका कार्यकारी निर्देशक अमरध्वज लामाले दाहाललाई अनलाइन न्युज पोर्टलको सम्पादक भएर काम गर्ने थप जिम्मेवारी तोकिएको बताउनुभयो । दाहालले रेडियो नेपालको रिपोर्टिङ शाखा प्रमुखको जिम्मेवारी सम्हाल्दै आउनु भएको छ ।
यसैगरी अङ्ग्रेजी भाषाको समाचारमा सम्पादक पदमा कार्यरत अर्जुन सापकोटालाई अनलाइन न्युज पोर्टलको सहसम्पादकको जिम्मेवारी दिइएको निर्देशक लामाले बताउनुभयो ।
स्रोताको सुझाव र सल्लाहलाई मध्यनजर गरी रेडियो नेपाललाई डिजिटल रेडियोको रुपमा विकास गर्न डिजिटल रेडियो स्टुडियो निर्माणको प्रक्रिया अघि बढाइएको कार्यकारी निर्देशक लामाले बताउनुभयो । डिजिटल स्टुडियोमा उत्पादित सामग्रीलाई रेडियो नेपालको अनलाइन न्युज पोर्टलका साथै सामाजिक सञ्जालमा राखिने उहाँको भनाइ छ ।