“जय जय जय लाखय्”को दोस्रो गीतको भिडियो विमोचित

काठमाडौं /इन्द्रजात्रामा काठमाडौंमा रंजितकार (छिपा) समुदायले निकालिने लाखेको बारेमा बनाइएको एनिमेटेड चलचित्रमा जय जय लाखय् को दोस्रो गीतको विमोचन काठमाडौंमा भव्य समारोहबीच गरिएको छ ।
लाखय् आजु नेवार धर्म संस्कृतिको एक महत्त्वपूर्ण पक्ष हो । यसको विशेष महत्त्व रहेको छ भने यसका गहन किम्वदन्ती तथा धार्मिक सांस्कृतिक महत्त्वका तथ्यहरु पनि रहेका छन् । गुंला लाखय् बिभिन्न स्थानमा जुनसुकै जातिका मानिसले निकाल्न सकिने परम्परा रहेको छ भने काठमाडौंको मजिपा: लाखय् को सवालमा भने यो यहीँको रंजितकार (छिपा) समुदायले मात्र लाखय् बन्ने अवसर पाउने गर्दछ ।
यस विषयवस्तुमा आधारित रहेर लन्डनमा रहेका संयुक्त श्रेष्ठ तथा उनका भाइ नियुक्त श्रेष्ठले संगुक्त रुपमा एनिमेशन गरी नेवार भाषा तथा खस नेपाली भाषामा निर्माण गरिएको चलचित्र हो जय जय लाखय् । यसै चलचित्रको दोश्रो गीत ‘हाकू सुपाँययात हे याउँक चीकेफुम्ह’ सार्वजनिक गरिएको हो ।
काठमाडौं महानगरपालिकाकी उपप्रमुख सुनिता डंगोल, वरिष्ठ कलाकार मदनकृष्ण श्रेष्ठ, नेवा:अगुवा, मानव अधिकारकर्मी मल्ल के. सुन्दर लगायतका व्यक्तित्वको उपस्थितीमा गीत सार्वजनिक गरिएको थियो ।
कार्यक्रममा धेरै चलचित्रकर्मी तथा नेवा: अभियन्ताहरुको उपस्थिति रहेको थियो ।
वर्ल्ड नेवा: अर्गनाइजेसनका अध्यक्ष समेत रहेका संयुक्त श्रेष्ठले सताब्दी पुरुष सत्यमोहन जोशी प्रेरणामा यस चलचित्रको निर्माण कार्य अगाडि बढाएका हुन् ।
सार्वजनिक गरिएको गीतमा स्वर सतिश महर्जनको रहेको छ भने संगीत विश्व शाहीले दिएका छन् । शब्द संयुुक्त श्रेष्ठकै रहेको छ । चलचित्रमा कथा शताब्दी पुरुष स्व. डा. सत्यमोहन जोशीको रहेको छ ।
नेपाल भाषाको पहिलो एनिमेटेड फिल्म “शंखधर साख्वाःया बाखं” ‘दि लिजेन्ड अफ शंखधर’ निर्माण गरेका संयुक्तले यस जय जय लाखय् को पनि निर्माण कार्य गरेका हुन् ।