नेवा: हुलाप्याखं कासा क्वचाल

येँ/ विश्व सम्पदाया धलखय् दुथ्यानाच्वंगु थनया वसन्तपू लायकू लागाय् वंगु शनिवाः नेवाः हुलाप्याखं  धेंधेंबल्लाः कासा -११४३ जुल।

नेपाल राष्ट्रिय खड्गी समाज येँ जिल्ला शाखाया ग्वसालय् येँ महानगरपालिकाया सहकार्यय् उगु नेवाः हुलाप्याखं धेंधेंबल्लाः कासा जूगु खः । वसन्तपूस्थित दशअवतार देगः क्वसं च्वंगु दबुलिइ जूगु हुलाप्याखं कासाय् अग्रिया सिंह न्हाप, रियाना मानन्धर लिउ, सुजाता नक: मि लियांलिउ लाःगु दुसा स्वस्तिहिरा सिखाकार व दृष्टि मानन्धरं हःपाः सिरपाः त्याकेत ताःलाःगु दु। कासाय् न्हाप लाःम्ह सिंह ट्रफीलिसें झिद्वः तका ल्हातय् लाकूगु दुसा लिउ लाःम्ह मानन्धरं न्हयुद्वः तका व ट्रफी, लियालिउ लाःम्ह नकः मिं ट्रफीलिसें न्याद्वः तका दा त्याकेत ताःलाःगु दु । हःपाः कथं सिरपाः त्याकेत सफल सिखाकार व मानन्धर निम्हेसित ट्रफी व म्हतिं निद्वः तका दां लःल्हाःगु खःसा जुरी च्वाइकथं सोहन शाही व रुमिका राईयात विशेष सिरपाः लःल्हाःगु खः ।कासाय् सुष्मा घलें उत्कृष्ट भेषभूषा, सनाया शाहीं उत्कृष्ट हाउभाउ, ओजस्वी प्रजापतिं उत्कृष्ट समाःया सिरपाः त्याकेत ताःलाःगु दु ।
येँ, यल, ख्वपलिसें किपुलिइ जूगु अडिसन ल्यःपिं कासामि दथुइ वसन्तपुलिइ लिपांगु धेंधेंबल्लाः कासा जूगु खः । ख्वीम्ह स्वयां अप्वः कासामिं ब्वति काःगु खःसा थुपिं प्यंगू थासय् जूगु अडिसनं लिपांगु कासाया. निंतिं पीनिम्ह छनोट जूगु खः ।

लिपांगु कासाय् वरिष्ठ नृत्य निर्देशकपिं नारायणदेवी प्रधान, भुवनदास श्रेष्ठ, राजु शाह व श्यामप्रसाद खड्गी अथे हे संगीतज्ञ अमरराज शर्मा, नांजाःम्ह संगीतकार गोविन्द ह्यूमत, संगीतकारलिसें म्युजिक ऐन्जर जुगल डंगोल व बालकृष्ण वंशी निर्णायकमण्डलय् च्वनादीगु
खः । अथे हे अडिसनय् महेशप्रकाश हाडा व बालमुकुन्द प्रजापति (येँ), अन्नपूर्णेश्वरी श्रेष्ठ व तिमिला गोपाली (यल), संजय शर्मा राजोपाध्याय व संगीता शाही (किपू) व राकेश थापा व भोगेन्द्र मानन्धर (ख्वप) निर्णायककथं च्वनादीगु खः ।
स्रोत:नेपाल भाषा टाइम्स