नेपाल भाषाया प्यपा: सफू छक्वलं विमोचन

यल/नागार्जुन पब्लिकेसन्स पाखें प्रकाशन या:गु नेपाल भाषाया प्यपा: सफू छक्वलं विमोचन याःगु दु ।   वंगु शनिवाः थनया कोपुण्डालय् च्वंगु सातोआकी भवनय् जूगु छगू ज्याझ्वःया दथुइ प्यम्ह च्वमिया बाखं सफूया पितब्वज्या याःगु खः।  ।          ज्याझ्वलय्”जि म्वानाच्वनागु दनि” माणिक उराय् ;”बाखं कि प्याखं” – रामेश्वर जलन;”चिग्व: मल्ता”-दिब्या बज्राचार्य,”मयजु कल: डट कम” – समान्त श्रेष्ठया सफू पितब्वज्या याःगु दु ।                                                                               नेपालभाषा परिषदया प्राज्ञ नांजाःम्ह साहित्यकार ध्रुव मधिकःमि मूपाहांकथं झायादीगु ज्याझ्वलय् नेपाल प्रज्ञा प्रतिष्ठानया प्राज्ञ अगिब बनेपाली, बाखं च्वमि सुधिर ख्वबि, मिसा साहित्यकार मुनाया नायः विमलप्रभा वज्राचार्यं मंकाःकथं सफूया पितब्वज्या यानादीगु खः  । मिसा साहित्यकार मुनाया ग्वसालय् जूगु ज्याझ्वलय्  मूपाहाँ मधिकःमिं साहित्य च्वयेगु ज्याय् स्रष्टातय् खने दयाच्वंगु अग्रसरता उत्साहप्रद खने दु धासें साहित्यिक संघसंस्थातय्सं ब्वँमियाथाय् तक स्रष्टातय् थ्यंकेत कुतः यायेमाः धयादिल । कवयित्री प्रतिसरा साय्मिं स्रष्टातय्त भिंतुना देछानादीगु ज्याझ्वलय् प्रतिष्ठानया प्राज्ञ अगिब बनेपालि, बाखं च्वमि सुधिर ख्वबि नुगःखँ तयादीगु खः ।