क्यानेडियन नेवाः गुथिया न्हूदँ व म्हपुजा

टोरोन्टोया स्कारबोरोय् च्वंगु हिमगिरि ब्यांक्वेटय् जूगु ज्याझ्वलय् ब्वति कयादीपिं सकसितं दकलय् न्हापां ‘न्हूदँया भिंतुना’ नारा थ्वयेकाः ज्याझ्वः जःखःया लागा चाःहिउगु खः । धिमेलिसें थीथी बाजंसहित मिसातय्सं पुजाभः व मिजंतय्सं न्हूदँया भिंतुना च्वयातःगु प्लेकार्ड ¥यालीइ ब्वति काःगु खः ।

भिंतुना र्‍याली क्वचायेकाः जूगु सभाय् गुथिया न्हापांम्ह उपाध्यक्ष विमलमान श्रेष्ठं गुथिं स्थापनाकालनिसें हे नेवाःतय् तःजिगु नखः म्हपुजा ज्याझ्वः याना वयाच्वनागु जानकारी बियादीगु खः । लिसें वय्कलं नेवाः संस्कार, संस्कृति ल्यंका तयेगु निंतिं गुथिं वइगु दिनय् याइगु थुकथंया ज्याझ्वलय् सकसिनं थःथःगु थासं फूचाःगु ग्वाहालि यायेत नापं ब्वति कायेत नं इनाप यानादिल ।

ब्रोक विश्वविद्यालयया प्रा. डा. टम ओ’निलं क्यानाडाय् थ्यंक वयाः नं नेवाः कला, संस्कृतिया प्रवद्र्धन यायेगु ज्याय् गुथिं याना वयाच्वंगु ज्यायात कयाः च्वछायादिसें विश्वविद्यालय व गुथिया मंकाः ग्वसालय् छुं दँ न्ह्यः जूगु अनुसन्धानया ज्यायात कयाः खँ कनादीगु खः ।

गुथिया नायः उत्तम माकःजुं नेवाः समुदाय दुने प्रचलनय् दुगु सकतां नखःचखः जात्रा, पर्व जीवनोपयोगी जूगु विचाः तयादिसें म्हपुजा नखतं थःगु आत्म दुने च्वंगु चेतनारुपी देवयात पुजा यानाः थः दुने स्वस्थता व समृद्धि हयेत ग्वाहायिल जुइगु छगू बिस्कंकथंया नेवाः संस्कृति खः धयादिल ।

मूछ्याञ्जे डा.प्रकाशलाल प्रधानं ज्याझ्वःया बारे कुलादिसें म्हपुजा मात्र छगू सांस्कृतिक पर्व जक मखसे थ्व सामाजिक, सामुदायिक, पारिवारिक अनुशासन व एकताया नं प्रतीक जूगु खँ धयादिल ।

गुथिया सल्लाहकार लक्ष्मणमुनि श्रेष्ठं नेपाःमिपिनिगु तःजिगु नखः स्वन्ति व नेपाल संवत् ११४५ न्हूदँया लसताय् भिंतुना देछनादीगु ज्याझ्वलय् ज्याझ्वःया कजि प्रतिमा प्रधान श्रेष्ठं सुभाय् देछानादीगु खः ।

न्हापांगु चरणया औपचारिक ज्याझ्वः लिपा ब्वति कयादीपिं सकलें झ्वःलिं मन्दः न्ह्यःने फ्यतुना म्हपुजा याःगु खः । म्हपुजा ज्याझ्वलय् शान्ति माकःजु, डा. शर्मिला प्रधान, गीता पन्त श्रेष्ठ, गायत्री कायष्ठ श्रेष्ठ, सबिना शाक्य, श्रीजा माथेमा श्रेष्ठ, मौसमि ताम्राकार, प्रतिमा प्रधान श्रेष्ठ, प्रेरणा प्रधान, डा. सुजा श्रेष्ठ, रमा राजभण्डारी, शान्ति शाक्य, मिलि राजभण्डारी लगायतं सहजीकरणया भूमिका म्हितादीगु खः ।

म्हपुजा सिधयेकाः धिमे बाजं, हुलाप्याखं, नेपालभाषा व नेपाली म्येँ न्ह्यब्वःगु खः । ज्याझ्वलय् निसः स्वयां अप्वः नेपाःपिनिगु सहभागिता दुगु गुथिं जानकारी बिउगु दु ।

-नेपालभाषा टाइम्स