अष्ट्रेलियामा स्थायी बसोबासका लागि आउने पहिलो नेपालीलाई गोल्डेन जुबिली अवार्ड प्रदान

सिड्नी, २६ फेब्रवरी /अष्ट्रेलियामा पहिलो पटक पीआर भिसामा स्थायी बसोबासका लागि आउनुभएका नेपाली अगुवा डा. नारायण प्रधान र इन्द्रा वनलाई सिड्नीमा सम्मान गरिएको छ। उहाँहरुलाई एक भब्य समारोहबिच ‘गोल्डेन जुबिली अवार्ड’ प्रदान गरिएको हो ।
अष्ट्रेलियामा नेपाली समुदाय बसोबास गरेको ५० बर्ष पुगेको अवसरमा सिड्नीस्थित लुक्ला टेलिभिजन र भिएफएमले संयुक्त रुपमा कार्यक्रमको आयोजना गरी उक्त अवार्ड प्रदान गरेको हो । डा. प्रधान र वनले पहिलो पटक अष्ट्रेलियाको पीआर लिएको नेपाली हुनुहुन्छ ।
उहाँहरुसँगै डा प्रधानकी धर्मपत्नी लिलालाई पनि सम्मान गरिएको थियो । प्रधान दम्पती सन् १९७४ फेब्रवरी १० मा स्कटल्यान्डबाट मेलबर्न आउनुभएको थियो ।
त्यस्तै, सम्मनित हुने इन्द्रा वन सन् १९७५ अप्रिलमा पीआरकै रुपमा सिड्नी आउनुभएको हो । वन अस्ट्रेलियाकै प्रतिष्ठित मेडल अर्डर अफ अष्ट्रेलिया पाउने नेपाली समुदायबाट पहिलो र एक मात्र हुनुहुन्छ ।
सयौंको संख्यामा नेपालीलगायत अन्य समुदायका व्यक्तिहरु उपस्थित समारोहमा डा. प्रधान र वनलाई नेपाली राजदुत कैलाशराज पोखरेल, एनआरएनए अष्ट्रेलियाका अध्यक्ष अनिल पोखरेल, अष्ट्रेलियाका संघीय तथा राज्यसभाका सांसद्हरुले संयुक्त रुपमा अवार्ड प्रदान गर्नुभएको थियो ।
डा. प्रधान र वन अष्ट्रेलिया आएपछि नेपाली समुदायको उपस्थिति बाक्लिएको एवम नेपाल–अष्ट्रेलियाबिच कुटनीतिक सम्बन्ध विस्तार भएको र दुवै देशका सरकारको पहलमा दूताबास र कुटनीतिक नियोगहरु स्थापना भएको मानिन्छ। अवार्ड समारोहमा राजदूत पोखरेलले सम्मानित व्यक्तिहरुले नेपाल–अष्ट्रेलिया सम्बन्ध विस्तारमा खेल्नुभएको भूमिकाको उच्च प्रशंसा गर्नुभएको थियो ।
अवार्ड वितरणपछि एनआरएनए अध्यक्ष पोखरेलले एक सन्देशमार्फत नेपालीहरुले अष्ट्रेलियामा बसेर गरिरहेको संघर्ष, नेपाली भाषा, संस्कृति र कलामार्फत मातृभूमी चिनाउन गरिरहेको प्रयासको प्रशंसा गर्नुभएको थियो । साथै, उहाँले डा. प्रधान र वनले गर्नुभएको त्याग, समर्पण र संघर्षको प्रशंसा गर्दै उहाँहरुले देखाउनुभएको बाटो पछ्याउनुपर्ने धारणा राख्नुभएको थियो ।
कार्यक्रममा बोल्दै न्यू साउथ वेल्सका संसदिय सचिब मार्क बुटिजिग, बिपक्षी दलका नेता मार्क स्पिकम्यान र अर्का नेता मार्क कुरेले अस्ट्रेलियामा नेपाली समाजको योगदानबारे मुक्तकन्ठले प्रशन्सा गरेका थिए ।
लुक्ला टि.भी का प्रधान सम्पादक डा. राजु मानन्धरले उपस्थितलाई स्वागत गर्नुभएको थियो भने कार्यक्रमका संयोजक तथा पत्रकार गणेश भट्टले कार्यक्रमबारे प्रकाश पार्नुभएको थियो । भिजन फर मोटिभेसनका संस्थापक महेश प्रसाईंले अध्यक्षता गरेको कार्यक्रमलाई अनुपमा बास्तोलाले सहजिकरण गर्नुभएको थियो ।(फोटो समाचार सहयोग -लुक्ला टिभी अष्ट्रेलिया )