महानगरको ज्यादतीवरुद्ध मण्डलामा विरोध

काठमाडौं /काठमाडौं महानगरपालिकाले डोजर आतंक चलाएको भन्दै विरोध प्रदर्शन भएको छ ।

पछिल्लो समय महानगरपालिकाले विकासको नाममा सार्वजनिक मात्र नभएर निजी जग्गामा समेत डोजर चलाएपछि सर्वत्र आलोचित बन्दै गएको छ ।

महानगरले विना सूचना, विना आधार निजी सम्पत्तिमा समेत डोजर चलाउन थालेपछि त्यसको विरोधमा आज माइतिघर मण्डलामा विशाल प्रदर्शन भएको छ ।

काठमाडौंका विभिन्न ठाउँका वासिन्दाले माइतीघरमा भेला भएर महानगरपालिकाले व्यक्तिगत सम्पत्तिमा डोजर चलाएको भन्दै प्रदर्शन गरेका हुन् ।

प्रदर्शनकारीहरुले बागमती किनारामा अतिक्रमण गरेर बसेका सुकुम्बासीहरुलाई हटाउन नसक्ने, लिंकन स्कूलले सडक नै मिचेर बिच बाटोमा पर्खाल निर्माण गर्दा समेत डोजर लगाउन नसक्ने लाचार महानगरपालिकाले लालपूर्जा भएको स्वबासीको सम्पत्तिमा डोजर लगाएर आतंक सिर्जना गरेको बताए ।

प्रदर्शनमा सहभागीहरुले डोजर आतंक बन्द गर, महानगरपालिकाको ज्यादती बन्द गर, सडक विस्तारका नाममा उठिबास लगाउन पाइँदैन जस्ता नारा लेखेको प्लेकार्ड बोकेका थिए ।

प्रदर्शनमा काठमाडौं महानगरपालिकाको मेयरमा स्वतन्त्र उम्मेदवारी दिएका सुमन सायमी अधिकारकर्मीलगायत विशाल जनसमुदायको सहभागिता रहेको छ ।
साभार:SamacharDesk