मण्डला टेलिभिजन घोषणा !

यें/ नेवा: संचारख्यः न्हियान्हिथं आधुनिकीकरण जुया वया च्वंगु दु । थ्व हे झ्वलय् प्रविधिया आधुनिकता लिसें अनलाइन टेलिभिजनया विकास नं जुया वया च्वंगु दु । थुकियात ध्यानय् तया: नेवाः संचार ख्यलय् अनलाइन टेलिभिजन कथं मण्डला टेलिभिजन शुरु यायेया नितिं बुधबार छगू ज्याझ्वःया दथुइ मण्डला टेलिभिजनया उलेज्या जूगु दु । येँ महानगरपालिका या उपमेयर सुनिता डंगोलं उगु टेलिभिजनया उलेज्या यानादीगु खः ।
ज्याझ्वलय् मण्डला टेलिभिजनया कार्यक्रम निर्देशक आर्यम नकःमिं लसकुस न्वचु तयेगु झ्वलय् थ्व टेलिभिजनया विशेषता धइगु प्रचलित नेपाल लिपिं जक सकतां खँ ब्वयेगु जुइ धका: जानकारी बियादिसें प्रचलित लिपि धइगु हे नेवा: म्हसिका जूगु खँ ख: धयादिल । ज्याझ्वलय् मूपाहाँ उपमेयर सुनिता डंगोलं अनलाइन टेलिभिजन थौंया आवश्यकता खःधका धासे थ्व अनलाइन माध्यम धइगु ल्याय्म्ह पुस्तालिसे स्वाना च्वनेगु लँ खः धका धयादिल । ज्याझ्वलय् नेप्लीज फेशन हामया हेमा मानन्धर, नांजापिं कलाकार मदनदास श्रेष्ठ व राजाराम पौड्याल विशेष पाहाँ कथं झायादीगु खः । थ्व ज्याझ्वः मण्डला टेलिभिजनया सुरबहादुर श्रेष्ठ या सभानायसुइ जूगु खः ।
वइगु य:मरि पुन्हिनिसें टेलिभिजन प्रसारणय् वनेगु ज्याझ्व: दुगु व उकिया नितिं कार्यक्रम निर्माण यायेगु ज्या जुयाच्वंगु कार्यक्रम निर्देशक आर्यम नक:मि जानकारी बियादिल ।