तेस्रो बिहे

-लघुकथा

महर्जन रत्न

“तेस्रो बिहेसम्म श्रीमान जीवित रहँदैन ।
बिहेको केहि समयमै श्रीमानको मृत्यु हुने योग छ “ज्योतिषको कुराले झस्किन झुमा ।

यसभन्दा अगाडि दोस्रो बिहेपछिको श्रीमानको मृत्यु भयो । पहिलो बिहे त २० वर्षको उमेरमा ५० वर्षकोअधबैंसेसँग भएको थियो । निकै धनी । उ सुनको पिंजडामा पाल्न चाह्न्थ्यो । तर उनी बिते।
उनले अथाह सम्पत्ति भने छोडेर गए झुमालाई ।

तेस्रो बिहे गर्ने तरखरमा लागेकी झुमा अलि सचेत भइन् । ज्योतिषले भनेका थिए -” कसैसँग मन्दिरमा झुठो बिहे गरेपनि यो खड्ग तर्छ ।” चौथो बिहेपछि भने राम्रो योग रहेको बताए ।

तिनले झुठो बिहेको निम्ति पात्र खोज्दै गरे ।
एक ४० नाघेको मानिससँग मित्रता बढाए ।
बिस्तारै मायाको नाटक पनि गरे ।
रातीको कथा एउटै कोठामा पनि बिताए कहिलेकाहीँ ।

गरिब मानिसको औकात र कमजोरी राम्रोसँग जाने । एकदिन उनले माग गरिन “तपाईंको एक दुई रुपियाँ खर्च हुन्छ मलाई सिन्दुर दिनुस् ।”
मानिस खुशी भयो । खुशीसाथ मन्दिरमा सिन्दुर लगाइदिए ।
संयोग झुमाको मन थाहै नपाई उनीसित नैं बस्दै गयो ।
बिहाको नाटक गरेथे तिनले तर बिहा साँचिकै भयो । आफ्नै घरमा नयाँ श्रीमानसँग बस्न थालिन्!

एकादिन झुमा ज्योतिषले भनेको याद गर्दै चिसो मन बनाइ रहेकी थिइ ।तेस्रो बिहापछिको योगको ।
एक्कासि भर्‍याङमा ठूलो आवाज आयो । दौडेर हेर्दा श्रीमान छटपटिरहेका थिए ।
झुमा केहि गर्न असमर्थ थिइन् ! उसको संसार घुमिरहेको थियो।हल्लिरहेको थियो ।