लक्ष्मी व सरस्वती (चिबाखं)

रिता महर्जन

लुसि व ला थें लक्ष्मी व सरस्वती न्हापाया इलंनिसें तसकं मिले जूपिं पासापिं । गन गन लक्ष्मी अन अन सरस्वती अले गन गन सरस्वती अन अन लक्ष्मी । थौं ई हिलावन । लक्ष्मीयात सकल मनूतय्‌सं ययेकाहल । लक्ष्मीया चालामाला ठिक मजुया वल। व गुब्लें सुयागु छेँय् गुब्लें सुयागु छेँय् बास च्वं वन ।
लक्ष्मी गुब्लें खुँ दाखुँतय्‌गु छेँय् बास च्वं वनी, गुब्लें बलत्कारीया छेँय्। गुब्लें देश मिया नइपिं नेतातय् छेँय् बास च्वं वनी सा गुब्लें म्व:नी, स्वन्ति थें जा:गु ततःधंगु नखःसं गुणस्तर हीन नसा त्वँसाय् अखाद्य ल्वाकछ्यानाः मिया नइपिं ब्यापारीतय् छेँय् । लक्ष्मीयात अजा:पिं मनूतसें भक्तिभाव क्यनाः थ: थ:गु छेँय् सालायंकी । लक्ष्मी म्हां धाये मफु।
थ्व फुक्क स्वयाच्वंम्ह सरस्वतीयात थ: पासाया व्यबहार खना: तं वल। वं थ: पासायात अथे मजुइत थुइके भनं ग्वःक: धाये नं धुंकल । लक्ष्मी धाःसा थ:गु चन्चलता बानी मत्वःतू । आ: वया लक्ष्मी व सरस्वती खुसिया किनारा बाया च्वं थें च्वनेमाल।
सरस्वतीयात न्ह्याम्हसिनं थ:गु ल्हातय् काये मफुत। सरस्वतीयात मनूतय्‌सं थ:गु ल्हातय् तयेत हिचःति हायेकाः उत्तिकं मेहेनत यायेमाल । उकें मनूतय्‌सं सरस्वती सिबें लक्ष्मीयात ययेकल। सरस्वतीया मू मनूतय् लागि म्ह्व जु जुं वन ।
छन्हु बुखँ वल “सरस्वतीया मू झितका जक।”