कालजयी स्वरका धनी फत्तेमान राजभण्डारी स्मृति !

गायक फत्तेमान राजभण्डारीले नश्वर शरीर त्यागेको पनि ८ वर्ष बितिसकेछ! आजकै तिथिमा उनको २०७० भाद्रको २५ गते भाद्र शुक्ल पंचमीको एकाबिहानै १२ बजेर ५० मिनेट जाँदा चाबहिलस्थित ओम नर्सिङ होममा उपचारका क्रममा ७७ वर्षको उमेरमा निधन भएको थियो! उनी लामो समयदेखि फोक्सोको क्यान्सरबाट पीडित थिए!
१९९३ साल मंसीर १३ वा ४ गते जन्मिएका उनले चारसय भन्दा धेरै कालजयी गीत र भजनमा स्वर तथा संगीत दिएका छन्!
उनको पहिलो गीत ‘यस्तो पनि हुँदोरहेछ जिन्दगीमा कहिले कहिले’ थियो! सङ्गीतकार नातिकाजीले २०२२ साल तिर यो गीत उनलाई गाउन प्रस्ताव गरेका थिए! रेडियो नेपालमा कहिल्यै नदेखेकालाई गाउन दिन मन नभए पनि गीतका रचनाकार यादव खरेलको मलाई यही गायक चाहिन्छ भनेर ढिपी गर्ने हैसियत पुगेको थिएन त्योबेला! मन मारेर खरेलले उनलाई गीत गाउन दिएका थिए! उनले यो गीतको खुब अभ्यास गरे! र रेडियो नेपालले हरेक वर्ष आयोजना गर्ने राष्ट्रिय गायन प्रतियोगिता २०२५ मा नातिकाजीको संगीतमा उनले यही गीत गाएका थिए! प्रतियोगितामा पहिलो स्थान उनैले पाए! एउटै गीतले उनलाई गायक र यादव खरेललाई गीतकारको रूपमा स्थापित गरायो!
उनले २०१३ सालमा बासु शशीद्वारा रचित नेपाल भाषाको नाटक ‘ता:चाप्वाँय्’ (साँचोको झुप्पा) मा अभिनय तथा गीत गाएका थिए!
नाटककार विजय मल्लको नाटक ‘किसि न्याइम्ह मदनमान’ का वास्तविक जीवनका मदनमान उनी नै हुन् भनिन्छ!
उनीद्वारा स्वरवध्द कालजयी गीतहरुमा यस्तो पनि हुँदो रहेछ, मर्न बरु गाह्रो हुन्न,वनै खायो डढेलोले मनै खायो त्यै मोरीको पापी मायाले, जिन्दगीको पाना भरि सुख देखिदैन, कस्तो माया लाइएछ आदि छन्!