“यस पटक अझ ठूलो चुनौती रहेको छ” – कुलमान घिसिङ

काठमाडौं / नेपाल विद्युत प्राधिकरणको आफ्नो पदभार ग्रहण गर्दै नवनियुक्त कार्यकारी निर्देशक कुलमान घिसिङले आफूलाई विश्वास गर्नेहरुप्रति निराश नबनाउने वचन दिएका छन् । पदभार ग्रहण गर्ने क्रममा कार्यकारी निर्देशक घिसिङले ‘यस पटक पनि अझ ठूलो चुनौति रहेको छ ” भन्दै तर आफूले चुनौती सधैं स्वीकार गरेर आएको बताए ।
“यो मेरो व्यक्तिगत जीवनको सबैभन्दा कठीन चुनौतीको समय हो । नयाँ जोश सहित कुममा कुम मिलाएर काम गर्दै अगाडि बढ्नेछु। ”
आम जनताको चाहना र सरकारको योजनाका कारण आफू पुन: प्राधिकरणमा आउन पाएको भन्दै उनले आफूलाई सहयोग गर्नुहुने सबैप्रति धन्यवाद ज्ञापन गरे ।
आफ्नो पहिलो कार्यकालमा देशलाई लोडसेडिङ्गबाट मुक्त बनाई विद्युत प्राधिकरणलाई अर्बौ रुपियाँ नाफामा लैजान सफल घिसिङलाई नयाँ सरकार गठन हुनासाथ प्रधानमन्त्री शेरबहादुर देउवाको पहलमा प्राधिकरणमा पुन: नियुक्त गरिएको हो । यसभन्दा अगाडि ओली सरकारले घिसिङको कार्यकाल थप नगरी हितेन्द्रदेव शाक्यलाई कार्यकारी निर्देशक बनाएको थियो ।
सोमवार भएको मन्त्रिपरिषदको बैठकले घिसिङलाई प्राधिकरणको कार्यकारी निर्देशकमा नियुक्ती दिने तथा शाक्यलाई जल तथा ऊर्जा आयोगमा विशिष्ट श्रेणीको पूर्णकालिन सदस्य नियुक्त गर्ने निर्णय थियो ।