आजु जय् हा: !

माणिक उराय्

– नरेश, ज्याकूया ज्या सिधयेका: थ:गु छेँ स्वया: लिहां वया: च्वन । लँय् थाय् थासय् दुवातय् गथांमुग: धंकात:गु दु । छेँय् थ्यंका: बहनी भूत प्रेत सीक वांछ्वयेत बौ बी मानी धैगु मतिइ खँ वायेकुवायेकुं वयाच्वं बले न्ह्यने वांछ्वया त:गु म्वाय् या ख्वलाय् चुलुया धेंक दल । सकलें लँजुवा: पिनिगु हररर न्ह्यूगु सलं नरेशयात मां दिक्क म्हुतु वाये मास्ते व:गु ख: । तर वाक्कु छिना: सह यात । थ:त स्या:गु थासय् वास्यावास्या याना थ:गु लँपु लित ।
छेँय् थ्यंका: तिरियात थ: लँय् द:गु व स्या:थाय् वास: थाका बीइत इनाप यात । तिरी सुन्दरिं, ज्यां त्यानुक्क लिहां झा:म्ह थ: भा:तयात नयेगु ज्वलं न्ह्यच्याकल । अले लं त्वका:, स्या: धा: थाय् वास: बुकल । ज्याकुलं लिहां वये कथं न्हिन्हिं टिभिइ बुखँ न्यनेगु बानि नरेशया । वास: थाथां, बजि ननं टिभी चायेकल। समाचारया हेडलाइनय् छगू बुखँ वल- ………. अफिसया नाय: श्री ……. यात मन्त्रीपरिषदया निर्णय कथं पदमुक्त यानां अख्तियार पाखें कारवाहि याइगु जुल ।
बुखँ न्यना च्वंम्ह नरेशया ख्वालय् मचायेकं न्हिलां जाल।
पिने दुवातय् तत: सलं ‘ आजु जय हा:… आजु जय हा: … ‘ धका: गथांमुग: वाये यंकूगु स: नं ताये दत ।