पहिले गुठीले गर्ने सम्पदा सँस्कृतिको काममा महानगरपालिकाले अपनत्व ग्रहण गर्ने — मेयर शाक्य

काठमाडौँ / कामपा २१ वडास्थित तःबहालमा थान गणेशसहित देवीदेवताहरू र तुंफः पुनर्निर्माण सम्पन्न भएको छ । पुनर्स्थापित देवी देवताको काठमाडौँ महानगरका प्रमुख विद्यासुन्दर शाक्य र पूर्वमन्त्री कृष्णगोपाल श्रेष्ठले उद्घाटन गरे ।

उद्घाटन कार्यक्रममा बोल्दै मेयर शाक्यले पहिले पहिले गुठीहरूले आफ्नै पहलमा गर्ने कार्यहरू अहिले स्थानीय सरकारले जिम्मा लिई गर्न थालेको छ । यहाँका सम्पदा संस्कृति संरक्षणलाई काठमाडौं महानगरपालिकाले अपनत्व ग्रहण गर्दै यस क्षेत्रमा काम सुरु गरेको हो भन्दै ,काठमाडौंका संस्कृति, सम्पदाहरू संरक्षण गर्ने क्रममा कुनै गुठी, खलःहरूको आफ्नै जग्गा छ भने त्यहाँ महानगरपालिकाले सांस्कृतिक भवन बनाइदिने गरेको बताए । महानगरपालिकाको यो सहयोगले गर्दा काठमाडौंका कतिपय गुठी खलःका सदस्यहरू मिली सामुहिक रूपमा जग्गा खरिद गर्न थालेको र त्यहाँ महानगरपालिकाले सांस्कृतिक प्रयोजनका भवन बनाइदिएको उनले बताए ।
महानगरपालिकाले गर्न लागेका केही कामहरूलाई अदालतले रोकिदिएकोमा दुःख व्यक्त गर्दै उनले भने, ‘यदि सर्वोच्चले नरोकेको भए अहिले यही वडाको लगन टोलमा लगन पार्क बनिसक्थ्यो होला । हामी यो लगन चोकलाई असन चोक, इन्द्रचोक जस्तै आकर्षक चोक बनाउन चाहन्छौं ।’ उनले लगन टोलको सिलखानामा पार्क उद्घाटन भैसक्दा पनि बनाउनेतर्फ काम गर्न नमिलेकोतर्फ इंगित गर्दै यो भनाइ राखेका थिए ।
कामपा २१ वडा कार्यालय र स्थानीय तःबहाः पुचःया संयुक्त प्रयासमा तुंफः र मूर्तिहरू पुनस्र्थापना गरिएका हुन् ।
उद्घाटन गरिएको थान गणेश लगनदेखि दक्षिण भेगमा बस्ने महर्जन, डंगोल ,श्रेष्ठहरु लगायत आदिवासी नेवा: समुदायको जन्मदेखि मृत्यु पर्यन्तका संस्कारमा पहिले पूजा गर्ने गरिएको स्थान हो ।