आज: | Tue, 04, Aug, 2026

होमपेज / समाचार

मरु सतलय् गजूयात लसकुस यात !

सुभाय् संवाददाता July 30, 2021 मा प्रकाशित (५ साल अघि) अनुमानित पढ्ने समय : ८ मिनेट

यें / नेपाःया ऐतिहासिक मरुसतः २०७२ सालया तःभुखाचं दुनाः पुनःनिर्माण ज्या जुयाच्वंगुलिइ आः याकनं हे ज्या क्वचाइगु सी दुगु दु । सतःया पुनः निर्माणया ज्या क्वचायकेत मरु सतलय् गजू छुइगु नितिं २०७८ श्रावन श्रावण १४ गते विहीवाः गजू दिकेत दयकातःगु प्यकंलागु व चाकलाःगु सिंयात लसकुस यानाः सतलय् तय् हयेगु ज्या जूगु दु । आः छुं न्हि लिपा सतःया पलिइ गजू छुइ ।
थुगु गजू दिकेगु चाकलागु तःचागु सिंयात गुरुजुया पल्टनया बाजं सहितं लसकुस यानाः मरु सतलय् तयहःगु खः । थन तये न्ह्यः थ्व गजूयात नापसं च्वंगु श्रीखण्डतरुमुल महाविहार सिखंमू बहाः दुने निन्हु तक तयाः अनया गुर्जुपिसं बज्रयानी तान्त्रिक विधिकथं पूजा याःगु खः ।
बहालय् तया: विधिकथं पाठ याना: पुजा क्वचाये धुंका: श्रावण १४ गते बसुवा: बहालंनिसें नेपाली सेनाया जवानतय‌्त क्वबुइकाः मरुसतलय् येंकुगु खः । थुबलय् गजूयात मरुसतःया लिसें सिँल्यं सत: (सिंह सत:) लिसें मरु चाःहिका मरु सतलय् दुत यंकुगु खः ।
जात्रा याना: ह:गु गजू दिकेगु सिं सतलय् दिके धुंकाः सिखंमू बहाःया बज्राचार्य व थीथी बहाःया बज्राचार्यपिं सहित जानाः मरु सतलय् लसकुस यासें बज्रयानी तान्त्रिक विधिकथं चर्या नृत्य सहित पूजा याना: गजू दिकेगु सिंया पुजा याःगु खः । बौद्ध विद्धान यज्ञमानपति बज्राचार्यया नेतृत्वय् थुगु पुजा जूगु खः ।
थुगु पुजाय् सिखंमू बहाःया गौतम रत्न बज्राचार्य, आनन्दमुनि बज्राचार्य, मणिसंघ विहार ज्याबहाःया गौतम बज्राचार्य, राजेश बज्राचार्य लगायत आपालं बज्राचार्यपिनिगु ब्वति दुगु खः ।
थुगु सतः दयकेत काठमाडौं महानगरपालिकाया आर्थिक ग्वाहालि पुनर्निर्माण समिति नीस्वना: ज्या न्ह्याकुगु खः । पुनर्निर्माणया ज्या समितिं २०७५ सालया वैशाखं निसें न्ह्या:गु खः । मरु सत: पुन:निर्माणया नितिं महानगरपालिकां आः तकया दुने ११ करोड ५० लख दां बिइधुंकूगु दु ।
ज्याझ्वलय् निर्माण समितिया नाय: प्रदेश सांसद राजेश शाक्य, येँ महानगर पालिकाया उपमेयर हरिप्रभा खड्गी श्रेष्ठ,समितिया न्वकू तेजरत्न ताम्राकार कामपा १८ वडा अध्यक्ष न्हूच्छेकाजी महर्जन लगायतपिनिगु नं ब्वति दुगु खः । ऐतिहासिक व धार्मिकरुपं तकं महत्वपूर्ण जुयाच्वंगु मरुसतःया दयके ज्या आः निलाया दुने क्वचायकेगु ग्वसाः दुगु खँ पुन:निर्माण समितिं धा:गु दु ।
लुमंकेबहजू छुं वाः न्ह्यो थुगु मरुसतः जःखःया अष्ट भैरबया पुजा या: खः । अष्ट भैरवया नां थुकथं दु
१) रूरूक भैरब (पिगंननी दुहां वनेथाय्)
२) संहार भैरब (गणेद्यःया छें क्वसं)
३) कपिल भैरब (मरूहिती क्वहां वनेथाय्)
४)भीषण भैरब (गणेद्यःया लिक्कसं)
५) असिताङ्ग भैरब (पचलि भैरबया खड्ग हिलेथाय् बौ वायथाय्)
६) क्रोध भैरब (नासःद्यःया लिक्क ध्याको बनियाया पस: न्ह्यःने)
७) प्रचण्ड भैरब (तहबिलया पुर्व व उत्तरया कुंनय् )
८) उन्मत्त भैरब (सिंल्यं सतःया पश्चिम या दुवातय्)
(सुगतरत्न सिन्दुराकारया समाचार ग्वाहाली)

प्रतिक्रिया दिनुहोस

सुभाय् मिडिया प्रा.लि.

ताम्सिपाखा , देयको , पुष्पलाल पथ काठमाडौं -१८

ईमेल: [email protected]

कार्यालय फोन- ०१-२१५६४४

स्थायी लेखा नम्बर- ६१२२८०१००

सूचना विभाग दर्ता नम्बर: ४५८/०७४-७५

सुभाय् मिडियाको लागि

संचालक तथा सम्पादक महर्जन रत्न

सम्पादक विजयकृष्ण श्रेष्ठ
राजेन्द्र महर्जन

सह-सम्पादक/ व्यवस्थापक रन्जु श्रेष्ठ

समाचार प्रमुख रवि महर्जन

फोटो सम्पादक नातिकाजी महर्जन

↑