सुरजवीरया ‘हाकुमैंचा’ पिदन !

थेमि/ सुरजवीर बज्राचार्यया च्वसां पिंज्व:गु अले वयकलं हे हालादीगु न्हूगु म्ये ‘हाकुमैंचा’या म्यूजिक भिडियो पिदंगु दु । थेमिया प्यासिफिक फुड ल्याण्डय् छगू ज्याझ्वलय् मध्यपुर थेमि नगरपालिकाया मेयर मदनसुन्दर श्रेष्ठया मूपाहाँसुइ उगु म्ये पिदने ज्या जूगु खः ।
नेवाः भासं सृजना जुइगु म्येया व्यावसायीकरण यायेमाःगुपाखें बः बियादिसें मूपाहां मेयर श्रेष्ठं । गुगुं समुदाय, वर्गया नुगःखँ सांगीतिक रुपं पिथना: अन्तर्राष्ट्रियकरण यायेफइगु खँ तयादीगु खः ।
म्येच्वमि व हालामि सुरजवीर बज्राचार्य भम्चा काःवनीबलय् नेवाः म्ये हालेगु चलनकथं थुगु म्ये च्वयागु खँ कनादिल । प्यारोडी म्येया रुपय् सृजना जूगु ‘हाकु मैंचा’ म्यें थःगु मौलिक रुप काःगु धासें लोकंह्वा:म्ह संगीतकार जूगल डंगोलया योगदानयात लुमंका दिल ।
‘हाकुमैंचा’ म्यूजिक भिडियो बालमुकुण्ड प्रजापतिया निर्देशनय् तयार जूगु खःसा देवेन्द्र प्रजापतिं छायाँकन व सम्पादन यानादीगु खः ।
नेपाल सांस्कृतिक उत्थान परिषदया पिथना थुगु म्यूजिक भिडियोय् मू- भूमिकाय् अनु खड्का, रमेश बल्ल व आशाराम शिल्पकार पिलूव:गु खनेदु ।
दिपक बज्राचार्य व सागर बनमालां कोरियोग्राफी यानादीगु, आशा तामाङं समा यानादीगु थुगु म्यूजिक भिडिया महेशप्रकाश हाडाया कजिसुइ निर्माण जूगु खः ।