हि-दान … (..a funny tale)

मथुरा साय्‌मि

छम्ह ल्यायम्हं छम्ह ल्यासेयात सिक्क येकाच्वन । गनं ध्वदुलकि वया ल्यूल्यू हे वनाच्वन । मिसां थ्व फुक्क वाः चायेकल । तर वयात व मिजं धाःसा यः मजू ।
छकः दूर्घटनाय् लानाः मिसा घाःपाः जुल । अस्पताल यन । बेहोस जुल । हि बीमाल । व ल्यायम्हं ” हि जिं बी ” धकाः थःगु हे हि बीकेबिल । मिसा लायावल । व हे मिजनं हि ब्यूगुलिं थः बचय् जूगु धकाः मिसां लिपा सिल ।

अस्पतालय् च्वॅतले मिजनं वयात न्हीन्ही धयाथे स्वःवन । गबलें स्वां , गबलें फलफुल नं ज्वनावन । बल्ल निम्हसिया नतुसुतु ब्यात । अले मिजनं आॅट यानाः धायेफत ” आइ लभ् यू । आइ वान्ट टु म्यारी यू ।” तर फसात , मिसायात धाःसा व मिजं यःगु हे मखु । मयःया वासः गनं मदु ।

मिसां वलिसे ब्याहाः याये मखु , वया ल्यूल्यू नं वयमते धकाः तसलं हाल । मिजंया तं पिहाॅवल । तमय् वं नं सः तस्सः याना धाल, ” नुगलय् हि मदुम्ह कःफ्वगिं । अयसा म्वाल ।जिं बियागु हि , जितः लित हिॅ ।”

मिसा तमं कर्कय् जुल ,” धा, छंगु हिया मू गुलि ? च्याद्वः, झिद्वः, नीद्वः । धाक्व पुले जिं , छु धकाः च्वना छिं ।”

” नो नो, हि हे माः दः । ब्लड् फर ब्लड् ।”

मिसाया सिक्क तं प्याहाॅवल । व धाये थ्व धाये मन्त । म्हुतुइ वः थे धाल, ” जिउ , हियागु बदला जिं हि हे बी तर मन्थ्ली बेसिसय् (monthly basis)जक । लच्छिइ लच्छिइ छकः।”

मिजनं खॅ मथुयाः म्हुतुइ पाकां सुल !!!!