न्हिलासू !!

मथुरा साय्‌मि

जाॅचय् फेल जुल धकाः अबुम्हं मचायात ब्वःबिल । तमं छत्थु नेतालय् दाया नं बिल । मचा प्याॅयक ख्वयाः बाज्याम्हेसिया क्वथाय् वन ।
बाज्याम्हं मचायात ज्ञान बियाः हेकल , ” छिमि ब्वा सिक्क हे छुच्चा। मचायात दायेयः । मचायात धैगु दाये हे मत्यः । जिं मचाबले वयात छत्थु धकाः हे मदाया । का म्वाःल , जिं छिमि बाःयात नित्थु दायाबी । चुप । ख्वयेमते । ख्वयेगु धैगु मज्यू । उकीसं छ ला जिमि पुता । छ ला झन मिजंमचा । मिजंत धैपिं अथे ख्वैला , लाता । का, चुप ।”

मचा ख्वयेगु दित। बाज्याम्हं नेतालय् थानाच्वंगु ख्वबि नं हुयाबिल । वखुन्हु बहनी मचा बाज्याम्हेसिथाय् हे द्यंवल ।

चान्हय् मचाया च्व फायेमालाः दन । बाज्याम्ह मिखाय् ख्वबि स्वःस्वः वयेकाः पुलि घयपुनाः सुकुसुकु ख्वयाच्वन ।

” बाज्या , बाज्या छाय् ख्वयागु ?” मचां न्यन ।
” खः पुता । यक्व लिपा थौ छिमि अजि म्हनाच्वन । व ला गपायच्वः गंसि जुयाच्वन । खॅ छगू हे ल्हाय् मलाक्क जि न्ह्यलं चायावन । जितः अथेंहे ख्वये वल पुता , छु याये ” बाज्याम्हं मचायात स्वस्वं खॅ कन ।

” बाज्या, ख्वयेमते । मिजंत जुयाः अथे ख्वये ज्यू ला बाज्या । ख्वयेमते बाज्या ” थुलि धयाः मचां बाज्याम्हेसिया ख्वालयच्वंगु ख्वबि हुयाबिल ।

बाज्याम्हं मचाया ख्वाः स्वस्वं थःगु ख्वालय् बुलुहुॅ न्हिलासू हयाबिल !!!