सोशियल डिस्टेन्स !! ( social distance)!!

मथुरा साय्‌मि

जा नये धुनेवं छगू ज्याय् तक्यने फुसा तक्यन । ज्या यानांतुं वनी । उसिचायाः लासाय् छकः थयक च्वनकि , फुंगय् छ्यों छगः थयक दिकलकि , आनां न्ह्यः वःथें जुयावनी । न्ह्यः वलकि तुरन्त हे म्हगसय् नं म्हनावनी । चान्हय् देनागु ला, न्हिनय् देनागु ला । काचाक्क धाये मफयाच्वनी ।
आनां न्ह्यः वःथें जूबले हे लाक्क न्ह्यःनेसं च्वंगु मोबाइल तिररर न्यात । न्याःगु सलं जिगु न्ह्यःसू ला कुसि तिंन्हू थे तिंन्हुया वन । मोबाइल कयाः स्वया। काय् भाजुया फोन ।
” छाय् बाबु ? ” जिं न्यना ।
” बाःया कार्ड लुलला ? थ्व सेकेन्द दोजया खोप बीगु शुरू यात । बाः नं उखुन्हु कैगु इण्डियन ला कि चाइनीज?” काय् भाजुया न्ह्यसः ।
ग्व , व खःला थ्व खःला । धाये हे मफुत । कार्ड दुगु जूसा न्हायकं स्वये थे खनीगु । थ्व लिपायात मानिगु धकाः झन छथाय् लुमंक स्वचाकागु । गन स्वचाकल , गन । आः स्वःस्वःथाय् मदु । क्या जक फसात ।
काय् भाजुयात धया, ” कार्ड मलूनि बाबु । थन क्वथां गनं पित यनागु हे मखु । थ्व थन हे दै । तनी मखु । आसे, मालास्वये । मालाः छन्त खबर याये ” थुलि धयाः काय् भाजुलिसेया खॅ चफुना ।
कार्ड मदयक ला थ्व निगूगु चरणया खोप बी हे मखु । उमि रेकर्ड तयमाःगु । न्हापांगु खोप काःगु दु मदु सीके माःगु । धेक्कार , ल्वःमना वनीगु नं गथे जक धायेगु । झन उखेथुखे मलाक्क धकाः लुमंक थयक स्वचाकागु । व हे ल्वःमंगु । थन तैगु धकाः धाये मफुत । आनांवःगु न्ह्यःन्ह्यी छखेलात । उघ्रिमय् हे हानं छकः मालेगु शुरू याना । न्ह्यःने ल्यूने छगू छगू छता छता यायां पुत्तुपुइका । मात्तुमाला । उछु , कार्ड ला थ्व हे ला खःनि । गनतः गनतः धैच्वना । सफू दुने स्वचाकागु भुसुक्क हे ल्वःमंगु काः । धेक्कार … । छु मज्यू छु मज्यू धाइ । बुरा जुइगु हे मज्यूगु जुयाच्वन क !!
कार्ड कस्सिक ज्वनाः छकः पुत्तुपुइकाः स्वया । छकः फिसिक्क न्हिला । गणेद्यःयात लड्डु छाःवये धकाः भाकल याये जक तेनागु । धन्य याये म्वाःल । अयनं छायेका छु गणेद्यःयात लड्डु । छु जुइ । लानाः नयेगु ला थम्हं हे ला खःनि । याकःचा न्हिले मास्तेवल । वास्यावास्या न्हिला ।
उघ्रिमय् काय् भाजुयात फोन यानाःछ्वया , ” बाबु , कार्ड लुल । थन हे दत । छं छकः चेक यानाः स्व । थ्व गुगुपती खः । अले कायेत गन वनेमाःगु । कायेगु थ्व याकन हे कायेमाः । ”
जि स्वाहाने छपु थाहाॅ वना । वया क्वथाया खापाय् कार्ड धंका । खापाय् त्वाक् त्वाक् यानाः धया , ” का बाबु , कार्ड थन तैबिया न्है। छकः स्व ।” थुलि धयाः जि स्वारामारां कुहाॅ वया ।
कोरोना भाइरस सरय् मजुइमा धकाः स्वास्थ्य मन्त्रालयं मनूत दुइ मिटर तापाक्क च्वनेमाः धैच्वन । जिमिसं ला ख्वाः तक्क हे चूमलाक्क च्वना तापानाच्वना । फोनं फोनं खॅ ल्हानाच्वना । जिमिसं खःगु यानाच्वना ला , मखुगु यानाच्वना ला 😂😂 !!!!