काठमाडौं महानगरभित्र भेरो सेलको दोस्रो डोज जेठ २ गतेबाट

काठमाडौँ /    देशमा कोरोना संक्रमणले तीव्रता लिइरहेको बेला सबैभन्दा प्रभावित क्षेत्र काठमाडौंमा चीनिया खोप भेरो सेलको दोस्रो डोज दिने तयारी भैरहेको छ ।    काठमाडौँ महानगर पालिका क्षेत्रभित्र जेठ २ गतेदेखि ११ गतेसम्म कोविड विरुद्धको चीनिया खोप भेरोसेलको दोस्रो डोज लगाइने भएको छ ।
यो पहिलो डोज भने हैन । स्वास्थ्य तथा जनसंख्या मन्त्रालयको बैशाख २२ गतेको र जिल्ला विपद् व्यवस्थापन केन्द्रको बैशाख २५ गतेको निर्णयअनुसार गएको (०७७) चैत २५ गतेदेखि बैशाख १५ गतेसम्म पहिलो मात्रा लगाएकाहरुलाई दोस्रो मात्रा दिन लागिएको हो । यसमा १८ वर्षदेखि ५९ वर्ष उमेर समूहका नागरिकहरु छन् । तोकिएका दिनमा तोकिएका खोप लाभग्राहीले कार्ड लिएर खोप केन्द्र जानु पर्नेछ ।
खोप लिने समय विहान १० बजेदेखि अपरान्ह ४ बजेसम्म तोकिएको छ ।
दोस्रो खोप लगाउन पहिलो खोप लिएको मितिका आधारमा तय गरिएको छ । जसअनुसार २०७७ चैत २५, २६, २७ र २८ गते पहिलो मात्रा लगाएकालाई जेठ २ गते दास्रो खोप दिइनेछ । यसै गरी चैत २९ र ३० गते पहिलो खोप लिएकालाई जेठ ३ गते, ०७७ र्चैत ३१ र ०७८ बैशाख २ गते पहिलो खोप लगाएकालाई जेठ ४ गते दोस्रो मात्राको खोप दिइनेछ ।
बैशाख ३ र ४ गते पहिलो खोप लगाएकालाई जेठ ५ गते, बैशाख ५ र ६ गते पहिलो खोप लगाएकालाई जेठ ६ गते, बैशाख ७, ८, ९ र १० गते पहिलो खोप लगाएकालाई जेठ ७ गते, बैशाख ११ र १२ गते पहिलो खोप लिएकालाई जेठ ८ गते भेरोसेलको दोस्रो मात्रा खोप दिइनेछ ।
बैशाख १३, १४ र १५ गते पहिलो मात्रा लिएकाहरुलाई क्रमशः जेठको ९, १० र ११ गते दोस्रो खोप दिइनेछ । यी दिनहरुमा पहिलो खोप लगाउनेको संख्या धेरै थियो ।
यसका लागि महानगरले वडाको समन्वयमा एक वडा १ केन्द्र हुने गरी खोप केन्द्र तोकेको छ ।
पहिलो खोप लगाएपछि संक्रमण भएर उपचाररत विरामीले १ महिना नपुगी यो खोप लिन मिल्दैन । महानगरको सहरी स्वास्थ्य विभागका प्रमुख हरिबहादुर कुँवर भन्नुहुन्छ, ‘पहिलो डोज लगाएका तर संक्रमण नभएका व्यक्तिहरुले खोप लगाएको मितिका आधारमा सार्वजनिक गरिएको तालिकाबमोजिम पहिलो खोप लिएको कार्ड लिएर तोकिएको पायक पर्ने खोप केन्द्रमा गएर दोस्रो डोज खोप लगाउन सक्नुहुनेछ ।’
यस अवधिमा करीब १ लाख ६० हजार व्यक्तिलाई खोप दिइने लक्ष्य छ । यो लक्ष्य प्रदेश सरकारको सामाजिक विकास मन्त्रालयले लिएको हो ।