निपा: ख्वा:पा:

रिता महर्जन

तःन्हु लिपा जिं जिमि मिले जूम्ह पासा धका: नाला तयाम्ह पासाया मेसेज वल। तसकं मफुगु हुनिं अस्पताल च्वनेमाल धका: च्वयातल । जितः छुं लिस: बिइ मंमन्त।
जितः व ई लुमनावल। गुब्लय् जि तसकं मफयाः लासाय् ग्वर्तुला च्वना । छेँय् बिचा: याइपिं मदुगु हुनिं ल्वय् लंकेत भतिचा ई काल । उब्लय् फतले थ: हे याना नया । तसकं मफयाः लासां दने तक मफुबलय् जिं जिमि मिले जूम्ह पासा हे लुमंका ।
जिं कल याना पासायात । जिगु बिचा: जि मफु धायेवं व फुक्क ज्याजि त्वःताः जित स्वयेत ब्वाँय् वइ । उकें जिं व हे पासायात लुमंकाः, जित नयेगु छुं हयाब्यु धका: इनाप याना। पासां तस्कं ज्यां यानाः लिमलाना च्वन, थौंयात रेस्टुरेन्टं अर्डर यानाः न ले न्हिं, कन्हय् सुथय् न्हापां मूया झोल व जा ज्वनाः जिं ब्यूवये धयाः फोन तयाबिल । ज्वर हपहप वयाच्वन। क्वा:लः व न्ह्य:ने दुगु बिस्कुट नयाः वास: नया।
ज्वर वया हे च्वन। थौं ला सुथय् न्हापां पासां मूया झोल व जा ज्वनावइगु आसं जि पियाच्वना । ई न्ह्याः वनाच्वन अय्‌नं पासा थ्यंकः मवः । जिं बिचा: याना दयेकाच्वन जुइ । वइन ला छेँज्या क्वचायेकाः वयेमा: । जि पिया हे च्वना।
व हे मवसेंलि जिं फोन याना । फोन मल्ह्वं। सायद लिमलात जुइ धका: बिचा: याना ।
ज्वर वःसां नं जिं मोबाईल चायेकाः फेसबुक छकः स्वया । फेसबुक चायेके खतं व हे पासाया पोस्ट खन । पासापिं नापं चाःहिलाः न्ह्याइपुका च्वंगु किपा ब्वयातल। जिगु नुग: तसकं स्यात अले मिखां ख्वबि हाल।
छं सुं मदु , छन्त न्ह्याब्लें ज्या माःसां जि दु न्हिं ? छन्त छुं जूसां जितः धा: न्हिं धाइम्ह पासाया निपाः ख्वा: दुगु खन । थौं पासाया फुक खँ ल्वःमन जुइ उकें मेसेज यात मफयाः अस्पताल वया धका:। पासाया छेँय् परिवार, त:केहेँ स्वइपिं ग्वा:ग्वा: दुम्ह। जितः धाःसा नुगलय् वया प्रति छुं सहानुभूति हे मदया वन।