महाकवि गिरिजाप्रसादयात लुमंकल !

यें/ ल्याय्‌म्हया वै‌ंशय् हे ७०गू स्वयाः मल्याक्क थी थी विधाय् सफू च्वयाः वंम्ह महाकवि गिरिजाप्रसाद जोशीयात थाै‌ बिहिबार लुमंकल ।
जाेशीया ८३ क्वःगु बुदिं लाकाः नेपाल प्रज्ञा प्रतिष्ठानं आयाेजना याःगु छगू ज्याझ्वलय् च्वमि शरद कसालं वय्कःया व्यक्तित्व व कृतित्वयात कयाः ज्यापाै न्ह्यब्वयादिल सा समालाेचक पूर्ण ताम्राकारं उकिइ टिप्पणी यानादिल ।
उगु झ्वलय् अन जाेशीया खण्डकाव्य हेल्चाया उलेज्या नं जूगु खः ।
ज्याझ्वलय् नवासे‌ प्रज्ञा प्रतिष्ठानया कुलपति गंगा प्रसाद उप्रेतीं याकनं हे प्रतिष्ठानं जाेशीया सफू हेल्चा नेपाली भासं अनुवाद यानाः पिथनेगु बचं नं बियादिल ।
उगु ज्याझ्वलय् कविं कृष्ण भक्त बोडे नारद वज्राचार्य रजनी मिला रमेशकाजी स्थापित व सुरजवीर वज्राचार्यं जाेशीया कविता ब्वनादीगु खः । अथे हे च्वमि नारायण ढकालं जाेशीलिसेया लुमन्ति कनादिल सा किरण सायमिं जाेशीया छपु म्ये हालाः नं न्यंकूगु खः ।
४९ दँया उमेरय् हे मदुम्ह जोशीं महाकाव्य कविता उपन्यास, म्ये, बाखं, नाटक लिसें थीथी बिधाय् थ:गु च्वसा न्ह्याकाः जनजागरण हयेत याेगदान बियादीगु दु।
वयक:या कविता संग्रह जनताया म्ये, पालिख्वाँय्, हाय् हाय् रे थ्वँया बात्चा अत्तिकं लोकंह्वा: । अथे हे विपात्र, व गमला थ्व खैथल, व ल्ह्वं जि झ्वाला, भाजंमिखा लोकंह्वा:गु उपन्यासत ख:। अले वय्कःया लोकंह्वा:गु नाटकत मध्ये
बाखाछेँ, हाकुस्वाहाने अादि खः ।
थी थी थासय् प्रशासनिक जागिर नयेगु लिसें यक्व ई तक वय्कः शिक्षण पेशाय् च्वनादिल । लिसे‌ वय्कलं ल्याय्म्हतयत संस्था दयेकेगु व मांभासं पत्रपित्रका पिकायेत नं हःपाः बियादीगु दु ।नेस १०५९ चिल्लागा: द्वादशी खुनु सक्वय् जन्म जुयादीम्ह वयक: नेस ११०७ दँया येँन्या: पुन्हिकुन्हु मदुगु ख:।