त्रास

विजयरत्न असंबरे
न्यादँन्ह्यःया खँ खः । तच्वकं भुखाय् ब्वल । यक्वसिया छेँ दुन । वयागु छेँ ला मदुं । तर च्वने मजिइक स्यन । छेँय् दुंपिं व मदुंपिं नं छेँया पिने तापाक्क शिविरय् । गुम्हं पाल ग्वया । गुम्हं टेण्टय् बास । लिसा लिसा कया भुखाय् ब्वया च्वन । छेँय् दुहाँ वने सकलें ग्या । गुलिखेला थथे लिथ्वया ब्वया च्वंगु भुखाचं दुंगु छेँय् ल्हाना नं सिइपिं दु ।
छेँ दुंपिं व छेँ स्यंपिंला त्वहेत्वति छेँ छुं हे मजूपिं तकं छेँय् दुहाँ वने ग्या । थःगु हे छेँ दया नं छेँ पिने हे च्वना च्वन । छेँय् वनेबले छुं जुइला धइगु त्रास । थ्व न्यादँया दुने वं थःगु स्यंगु छेँ भिंकल । थः दुमदु याना आखः ब्वंका तयाम्ह याकः काय् नं अमेरिकाय् हिचःति हायेका कमेयाना तःगु दां छेँ भिंकेत ज्या वल । भुखाचं स्यंकुगु छेँ छकु च्वनेजिक भिंकेफया वयागु नुगः तसकं लयता । व थःगु हे छेँय् च्वंवःगु नं ताः मदुनि । हाकनं संसारय् कोभिड १९ नांयागु ल्वचं त्रास ब्वलंकल ।
झन वया काय् च्वना च्वंगु अमेरिकाया न्यूयोर्क शहरय्ला कोरोनां कया नेपालीत तकं पुकुपुकु सित धाल । थज्यागु खँ न्यना वयागु ग्याचिकु अप्वया झन अप्वया वल । धन्न आःतक वया कायेत छुं जुउगु मदुनि । अनहे च्वना लकडाउनया अनुशासन पालना याना च्वन । छेँय् हे च्वनाच्वंतले थ्व ल्वचं पुना हइमखु* हं । थन नेपालय् नं लकडाउन जारी यानातःगु दु । सुं नं थःगु छेँय्नं पिहाँ वयेमते धयातःगु दु । पिहाँ जुइपिन्त गुगुनं बखतय् ल्वचं कयेफु हं । “ थ्व गज्यागु त्रास ब्वलंगु धया ! भुखाय् ब्वबले थःगु छेँय् दुहाँ वनेत ग्यायेमाल । आः छेँ नं पिहाँ वनेत ग्यायेमाल । हे भगवान ! ” वं थुलिसिबें अप्वः छुं विचाः यायेमफुत ।

*संक्रमित जुइमखु