सत्यमोहन जोशीया वृत्तचित्रया न्हापांगु क्यनेज्या

यें/ लगभग स्वदँ न्ह्यः निर्माण ज्या न्ह्याःगु वाङ्गमय शताब्दी पुरुष सत्यमोहन जोशीया १५ घौ ताःहाकःगु अन्तर्वाता दूगु भिजुवल आर्काइभ व वृत्तचित्र ”म्वानाच्वंगु इतिहास वाङ्गमय शताब्दी पुरुष डा. सत्यमोहन जोशी” दयेकेगु ज्या क्वचाःगु दु ।
वाङ्गमय शताब्दी पुरुष सत्यमोहन जोशीयालिसें यल महानगरपालिकाया मेयर चिरिबाबु महर्जन, दातापिं व मेमेपिनिगु उपस्थितिइ थौं उगु वृत्तचित्रया न्हापांगु क्यनेज्या क्वचाल ।
थौं यलय् जूगु उगु क्यनेज्या ज्याझ्वलय् सछिदँ पुवनेधुंकूम्ह बहुआयामिक व्यक्तित्व विशेष पाहाँ सत्यमोहन जोशीजुं थःगु हे बारे दयेकातःगु वृत्तचित्र स्वयाः थुकियात छम्ह व्यक्तिया बारे जक मधासे समस्त नेवाः भाषा, संस्कृति व नेपालया हे चित्रया रुपय् कयादिइत इनाप यानादिल ।
मूपाहाँ कथं यल महानगरपालिकाया मेयर चिरीबाबु महर्जनं सत्यमोहन जोशीया सछिदँ बुदिं हनेगु ज्याझ्वलय् तःगु मछि ज्या जूगु मध्ये थुगु ज्या छगू ऐतिहासिक ज्याझ्वः खः धयादिल ।
ज्याझ्वलय् थुगु ज्या ताःलाकेत आर्थिक ग्वाहालि यानादिइपिं दातापिं लक्ष्मीदास मानन्धर, मोतिलाल शिल्पकार, यज्ञरत्न धाख्वाः, कैलाशभक्त प्रधानाङ्ग, डा. सुमित्रा मानन्धर, नेवाः देय दबू व नेपालभाषा एकेडेमीयात हनेगु ज्या नं जुल ।
यल महानगरपालिका व सत्यमोहन जोशी वृत्तचित्र निर्माण पुचःया मंकाः ग्वसालय् दयेकूगु  उगु डकुमेन्ट्री क्यनेगु ज्याझ्वःया सभा नायः वृत्तचित्र निर्माण पुचःया नायः डा. पुष्पराज राजकर्णिकार जुयादिल, न्वकू शाक्य सुरेनं लसकुसयासें उगु ज्याया पृष्ठभूमि कनादिल ।                                   म्वानाच्वंगु  इतिहास लिपाया पुुुस्ताया नितिंं अध्य्ययन व    प्रेरणाया स्रोत जुइफु डकुुमेन्ट्री  निर्माण पुुुच:या नाय: डा. पुुुष्पराज  राजकर्णणिकारं कनादिल ।