न्व:कथि – चिबाखं

माणिक उराय्

तक: बाज्या: ताउ जाल तलं कुने, कुनें तले, थ्व कोथां व कोथा, याना छु ख:मस्यु माला च्वन । भुनुभुनु नं हाला जुल ।” थन हे दय् मा:गु। म्हिग:ला थन हे तयागु ” अले तले स्वया हाल ” अय् अजिम्ह जिगु बजाँ त्वनेगु नकथि खंला हाँ छं ?” तलं ग्यान्थकुं अजि हाला हल ” आम्कन हे झ्या फले कुं चाय् मदुला? ” ” मदु धया” लागिलागि चाल तक: बाज्या । सुथया ज्योना भपिइ सिधयेवं बजां छसा: मसायेकं चित्त हे मच्वं तक: बाज्याया । चिलिमय् च्वंगु मि हे सी थें च्वने धुंकल । होखां चिलिम लिकया म्हुतुं हे फूफूयाना मि ग्वाकल । चिलिमया प्यंनय् हे म्हुतु दिका फुइफुइ निथु साल । चिलिमया मि ग्वात । म्हुतुइ जाय् क कुं थन । फुइंइ इ याना कुं म्हुतुं पिकाल । तर नकथिं साला क्वय् ल: क्वारारारा स:वयक साले बले गुलि मज्जा व: उलि मज्जा चिलिमं तप्यंक साले बले मव: धैगु खँ तक: बाज्याया पाउं ख्वालं क्यना च्वन । अथे जूसां बाज्याया तल तल लंकेत मय: मय: बजां साला च्वन । मिखां धा:सा अझं नकथि मालां तुं च्वन ।
” गन जक तल जुइ ? … ला:सा बाउचां जकं घ:चा म्हितेत मयंकूला? थ्व छय् चा सुज: नं जिगु हे नकथीं घ: चा:म्हिते मा: । इमिथाय् छें म्हिते थाय् मदु । थन धका: बाहा दु । खैखैं वं हे यंकल जुइ ।” म्ह्याय छय् सुज:या ख्वा: जक लुमं बले तक: बाज्याया चिलिमं वंगु पाउं कुँ नं चाकु माकु थें जुया बिल । हाकनं ताहाकय् क निथु बजां साल ।                                  २२ नोभेम्बर २०२०