जि आ: फ्री जुल- चिबाखं

सौरव शाक्य

न्हू सतकय् वंगलसिमा क्वय् पत्र पत्रिका स्वयाः भुगाेलपार्क जुना लुखुरू लुखुरू बसन्तपुर पाखे वनाच्वना जि । ल्यूनं सुनां सतूगु सःलं जिगु न्हायपं सालाकाल । लिफ पूला स्वया । ल्युने छम्ह साहित्यकार दाजु । वयकः खनाः अजू नं चाल जि । छ वा न्ह्यःतिनि वयकःङयात अस्पतालया बेडय् नापलाना वयागु पासापिं नापं जि । ” अाेहाे छि ला …गुबले डिस्चार्ज जुया दियागु..अापुलुकं नापलात नि.. व नं न्हू सतकय् ! ”
जिगु खँ हे पू मवंका वं न्हिलाः धाल ” अाः सदां झी नापलाये दइगु जुल , जि अाः फ्री जुल । काय् पिसं पसलय् नं च्वने म्वाल हं ! छिमि भाउजुं नं साहित्य गाेष्ठी जुसां तंचाय् मखुत हँ..न्हिं न्हिं च्वयेगु ज्याः याः हँ ! छि यःयःगु भपिया दिसं हँ ! मजूला गजप..काःनु थाैं जिं छंत यःगु ममःचा नः वनेगु ! ”
वयकःया खँलं मनय् भतिचा च्वास्स सुल । जिं वयकया ख्वाः स्वया । ख्वाः निभाःथें चकं ।
वयकः नापं जि थाैं मःमः न नं कबिताया खँ ल्हानाच्वना । वयकलं याकनं हे छगू कबिता सफू पिकायेगु खँ ब्याकल । दकलय् ताज्जूप ला ध्यबा फुकं भाउजूं हे तइबीगु हँ ! ” खँ ल्हा ल्हाः वयकःया ख्वालय् लसताया स्वां ह्वल ।
जि नं वयकयात याकनं छगू कबि गाेष्ठी याये त्यनागु खँ कनाः । वयकः झन हे लयताल कबिता ब्वने दइगु अले पासपिं नं नापलाये दइगु खना । जि अन नं वयकलं यक्वहे छ नापं खँल्हाये मानी धासां छेंय् ज्या लुमंसे वया लिपाः नापलाये धया बाया वया ।

थाैं जि वयकया छेंय् वना साहित्य गाेष्ठीया ब्वनापाै ब्यू वनाच्वना । तापाक हे खन जिं वयकया छेंय् पिनय् मनूत हुलमुल । न्ह्यने थ्यंलिसे खन अन ला फुकं धायथें हे पासापिं । अाेहाे..मनय् ख्वाउँया वन लिक्क द्यवं फायेका सीम्ह ग्वतूकातःगु । छम्ह पासां न्ह्यने थ्यनेवं ” छन्त हे फाेन यानाच्वनागु जिं…वयक मंत धायेत ” ।
जिं छुं लिसः बी मफूत..सासः हः हः पंथें जुल । जि अाः फ्रि जुल धाःगु जक मिखालय् वयकया ख्वाःजुसिं जुसिं वयाच्वन ।