अजूचायापुगु सहरय् !

महर्जन रत्न

चा: ह्युह्युं छगू सहरय् थ्यन ।
व सहरय् झिदंति न्ह्य: महामारी व:गु हँ !
सहर हिसिचादु । कलात्मक । स्व:स्व:गु बांला: ।
तर अन गनं सुं जूगु मखना ।
सहर यचुसे च्वं !
न्ह्याब्लँय् धुफ्व: दनाच्वनिगु हँ ।  व न मदु आ: !
सहरया सर्ग वंचुसे ह्वातां हे चालाच्वं आ: । सहरया फुक्कंं थाय् चा: ।
देय्ग: नं त अथें चालाच्वन । नयेम्वा:म्ह द्य:,  देय्गलं पिने वया: याउँक निभा: पानाच्वन ।
द्य:या नं म्ह हे याउंसे च्वं थें च्वं । तनाव नं मदु । सुं व: नं मदु । छुं फ्वं व: नं मदु ।
देय्ग:या फयगं फसं न्या: न्ह्यायपं याउँक , संगीतमय जुइक ।
तर तग्व: गं था: मदु ।
बुँफांँत  वाँउसे च्वं । तर छु छु बुया वयाच्वंगु हे मसिल । घाँय् तरकारी वा छुं मेगु मा धाये थाकु ।
च्वलय् ,दुुुगु ,सातय् याउँक नये खं ।
फुक्क थाय् चाहिला स्वयां सुं मनू नाप मला: । अजू !
यैपुगु न्ह्यैपुगु छें त । देय्ग: । लँ । चकं थाय् !
यचुगु ल: बा: वनाच्वंगु खुसि सकतां ल्व: हे वं ।
लकस तस्कं न्ह्यैपु ।”आहा” मनंमनंं धाये ।
लुमुगु निभा: जलय् म्ह नं जराक्क क्वा:!
तर थुखे नं सुं नाप मला: ।
ता:ई चाहिले धुनागु भचा त्यानु चाल । प्या:नं चाल।
खुसिया यचुगु ल: ल्हातं पास: पास: कया: त्वना ।
आहा: गुलि सा:गु ल:!
त:न्हू लिपा छें पिहांवया: चाह्यु वइम्ह जि ।
थ्व अजूचा:गु सहरय् थ्यना ।
अजू न्हैपु ।
आनन्द ! सकतांं अजू अनुभूति !
जि वनाच्वना ।
खुसी पारी स्यंगु थें गुँइँ । स्वयम्भू पुराणय् च्वयात:थें रश्मि पिहां वइ च्वन । मेेेेगु अजू । जि उखे वनेत स्वया ।
छगू हुल माक:त वया: जित: ख्यांय् ख्यांय् यायां लँ पं वल ।
इमिगु लागाय् दुहां वयेमते धा:थें । जि वनेला वयेला जुुुल !
“घुइँघुइँ” मोबाइलया भाइब्रेसनं जि झसंग वन । जिगु न्ह्य तन ! अजू देयया म्हगस नं चब्बुत !  जि ला थ:गु हे खाताय् ।
मिखा गेगे याना: मोबाइल चायेका: स्वया ।
“भिंतुना दु छिगु रिपोर्ट नेगेटिभ दु ” मोबाइलय् मेसेज व:गु जुयाच्वन ।
ई खना: अजू चाल । अजू अनुभूति ।
जीवन म्हगस, वास्तविकता !
जि मनोपरामर्शदाता ! जि साइकोलोजिस्ट !

°°°