बाखंया सुरुवात ! – चिबाखं

बाखंया सुरुवात गथे जुइ मसिल !
थाैं खिचा पुजा। छेँ छेँ लहिना त:पिं खिचतयत पुज्याइ थौं ।
सागु भिंगु नकिइ त्वंकिइ । न्हापा लिपा न्ह्यागु धाये मा:सां न्ह्यागु याये मा:सां थाैं छन्हु ला पुज्याइ । धाये थौं खिचा दिवस Dag’s day !

झ्यालं पिने स्व:वंम्ह जिमि मां ब्वाँय् वया: धा: वल –
“पिने सिइयुम्ह खिचा झिथाय् थ:स्वया च्वन ! स्वसा: ! बिस्कुट निपा प्यपा नका थकि हुँ।”
टिभि स्वयाच्वनाम्ह जि स्वयेगु त्व:ता: वाथाइथिं दना: कुने स्वया ।
धाथें सियुम्ह खिचां आसाकुति पहलं थस्वया च्वन ।
व अनं मवनेमा धका: जिं स: बिया “अय् सियुचा ! ”

पिनें छेँय् वयेबलय् न्ह्याबलय्ँ छेँ तक ल्यू ल्यू वइम्ह सियुचा । वैत जिं नकेगु नं याना । बिस्कुट नकेगु तर नयेगु ब्यूसां गुबलय्ँ नइ गुबलय्ँ नइमखु । निन्हु स्वन्हु दत वैत बिस्कुट मनकागु नं ।

छगु पुरि बिस्कुट ज्वना: कुहां वना । सियुचा गेटं पिनेसं च्वनाच्वन तिनि । न्हापा लिपा जूसा न्हिपं संकिम्हं थाैं छुं नं मया:। जित:तुंक्क स्वल । जित:थाै नक:हये म्वाला धायेत्यंथें च्वं वं !
जिं बिस्कुट लिकनां न्यापा खुपा वया न्ह्याेने तयाबिया। ल: नं तयाबिया । वं बिस्कुट छक: नतुन । जित:छक:नं स्वल । अले वं बिस्कुट नयेगु सुरु यात:।
छपा छपा यायां बय्ँ च्वंगु फुक नल। जिं ल्यं दुगु बिस्कुट नं तयाबिया । व नं फुकं नल। नयेसिधेका ल:त्वन ।

जित:छक: हानं स्वल। मगानि धागु ख:ला कि , जिं मसिल । जिके मेगु दुगु नं मखुत:। तर वं जित: स्वयाच्वन । सायद मेपिनि स्वांमा: क्वखाथें वया नं क्वखायेगु मन जकं यात ला !
लुखाय् छम्हा स्वांमा: तैतगु । व हे कया: सियुचित क्वखायेका बिया ।
बल्ल वं न्हिप्यं संकाहल । व न्यासिचाया तिंन्हुल । जिगु म्हय् धित्तुध्युंवल । गुलि लयता:गु व !
लय् ताया व तिंतिं न्हुया न्यासिचाया गल्लिपतिइ वनाछ्वत सायद मेपिन्त गर्वसाथ क्यंवने त्यंगु जुइ “कास्व जित: नं पुज्याइपिं दु !”
जित: आत्मसन्तुष्टि दत !
व वनाच्वन , जिं वयात खने दतले स्वयाच्वना।