भुखाय्

माणिक उराय्

बहनी भुतुज्या सिधयेका समिरा थ:गु कोथाय् द्यनेत वल । अवले हे वैगु न्हायपनय् नापसं च्वंगु कोथाय् दुने खँ ल्हाना च्वंगु दुहां वन । वं वास्ता मयासे थ:गु कोथाया खापा चायेकल। अवले हे वया न्हायपनं थ:गु हे नां का:गु ताल। वया दुनेया खँ न्यने मास्ते वल। वं तीजक नापसं च्वंगु कोथाया लुखाय् न्हायपं दिकल। दुने थ: माजु लक्षिमी व भा:त अमरया स: ताये दत। दुनेया खँ न्यना: वया झँझँ न्यने मास्ती वल । दुनेया स: वयागु न्हायपं जुया नुगलय् धुनुषबाण थें तिति याना दुहां वन । खँ थुया व:लिसे समिराया न्हकुसँ तिंतिं स्वाना वल। भुइच:ती हाल। वया मिखाय् थ:गु अतितया खँत संकिपा थें बुलुहुं लुया वल । वया नुगलय् भ्वखाय् ब्वल। कथु गना वल। म्ह नं लिगिलिगी सना वल। वं छुं मचाल। वं निपा ल्हातं थ:गु कोथाया खापाय् ब:काल। पलख ता:हाकय् क सास:ल्हात । अले बुलुहुं खापा चायेका कोथाय् दुहां वन । समिरायात इक्कुसे च्वना वल । खाताय् भाराक्क भ्वसु वन ।वया न्हाय् पनय् वया भा:त व माजुया खँत लिसालिसा कया मुलुं सुइथें तिक्कतिक्क मिंक दुहां वन च्वन। समिरां थ:गु भबिष्यया जिवनया स्वरुप, छगू झिझां मिझां दंगु, भुखाय् ब्वया: कुचाकुचा जूगु भिखाचा थें जुइगु तायेकल। वं स्यू छन्हु थ्व दिन वैतिनी। तर थुगु रुपं वै धका: वं बिचा: तकं यागु मखु। छन्हु वयागु भिखाचा क्वदली तिनी धैगु वं बिचा: यानात:गु ख: । तर थुलि याकनं थयागु धाकुफसं पुइका यंकिइ धका वं वा:चा नं त:गु मखु। व छम्ह मिसा…..वया कर्तब्य धैगु हे सहयायेगु जक जुया बिल। व थुके लाचार। वं छुं प्रतिकार यायेगु आंट यायेमफु । वं स्यु… थ्व परिस्थिति वया थ:गु शारिरिक दुर्बलतां याना व:गु संकट ख:। अयसां वं थुके थ:गु अधिकार लाका यंकूगु खन ।
खय् तला वया इहिपा जूगु नं त:दँ दये धुंकल। त्यपू जीवन वया तसकं न्ह्यइपु। इपिं निम्हसिया य:त्य:, थ:थिति,ज:लाख:ला, म्हस्युपिं सकसियां ल्व:वं। गुम्हं गुम्हं सियाला ईर्ष्याहे जुइगु । समिराया व भा:तम्हदिया दथुइ छुं कचवं मदु । गबलें छुं कथंया मगा: मचा: धैगु नं मदु । सकतां मनं खं थें पूवं । भा:तम्ह अमरं नं तसकं मतिनाया। व इत माजु ब्वा:जुंनं थ:हे म्ह्याय् भा:पा: माया याना त:गु ख:।
तर….थौं थ: माजु लक्ष्मी व भा:त अमरया खँ न्यना: समिरा आकासं कुतुं वंम्ह थें जुल । वयागु लुँयागु महल दक्वं छक्वलं भाराभुरुं क्वदल। वया मतिनाया संसारे छम्ह मेम्हहे मिसा वया प्याखं ल्हूवैगु जुल । वया भा:त अमरं मेम्ह मिसा ब्याहा याइगु जुल हँ। ख: वया १०दँया त्यपू जीवनय् मगा:मचा: धैगु व छगुजक बिडम्बना धैगु वया आ: तले मचा मदु ।मचा दयेकेगु कुतलय् निम्ह त्यपूनं छु छु जक मया: ? द्य: द्य:थाय् भाकल याना मजूला? होम याक:मजूला? धा:धा:पिं डाक्टरतय् वास:मन:ला? दक्को फुक्क कुत: यानानं वया मचा मदु । अथे जुया हे थौं वया माजु व भा:तया दथुइ अत्यन्त गम्भीर सहलह जूगु जुल । तर … समिराया नितिंला थ्व छगू त:धंगु भुखाय् हे जुया बिल । वया १०दँया मतिना छगू जक खं क्वदल। व छम्ह म्हय् प्राण मदुगु कंलाय् जक जू वनिइगु वं खंकल । तर छुयाये …. वं थुके प्रतिवाद नं याये मफु । छाय् धा:सा वं स्यु… वया भा:तया कूल न्ह्याकेत व थुलि मछि सम्पतिया वारेश छम्ह मा:गु नं अबश्य ख: । व समिरां बीमफुत । वैत भाग्यं ध्वँ लात। वहे हुनिं थौं व थ:थम्हं लाचार जुया थ:गु मतिइ खँ लुइका: च्वनेगु व थ:गु कर्म यात ख्वाख्वा त्याना: च्वनेगु बाहेक मेगु लँपू खंके मफुत। समिरां थ:गु नुग:क्वातुका: द्यनेगु फगत कुत: यात ।
( थुगु बाखं २०४७ साल पाखे च्वयागु ख: – च्वमि)                  – सुभाय् पोस्ट चिबाखंं प्रकाशन ४ न्हुया चिबाखं Day 4