क्यानभासमा सजाइएका घामले खाएका मुहारहरु

सुधीर ख्वबि

केहि स्यालहरु
बाघको छाला ओढेर
राज गरिरहेका छन्
अराजकता जपेर ।
ब्वाँसो र गिद्ध
मित्रता दिवस मनाउँदैछन्
निरीह खरायोलाई
कवाफ बनाएर ।
चिलहरु
कागहरू
झुम्मिरहेका छन्
सितन चाख्न ।
वर्तमानको चित्र
यति असरल्ल
कसले सोचेको थियो र ।
खप्परको प्यालामा
पिइरहेका छन्
रगत पसिना नरभक्षी सोचले ।
घामले खाएका अनुहारहरु
सडकपेटीमा लाम लागेर
भोक निलिरहेका छन् ।
होर्डिङ बोर्डमा
मैनबत्तीको चित्र सजाएर
अँध्यारो बिज्ञापित भएको छ ।