हिउँमा लेखिएका नामहरु

– तीर्थ श्रेष्ठ
हामीले
लेखेर आएका छौं
हिउँमा आफ्ना नामहरु
एकछिनपछि हिउँ थपियो भने
रहने छैनन् हाम्रा नामहरु
एकछिनपछि घाम लाग्यो भने पनि
हामी रहँदा रहँदै
नरहने हाम्रा नामहरु
हामी नरहँदा
कसरी रहलान् हाम्रा नामहरु !
हामीले
लेखेर आएका छौं

कवि तीर्थ श्रेष्ठको कृति “धर्सैधर्साको चक्रब्यूह” यस वर्षको मदन पुरस्कारका निम्ति छनौटमा परेको छ ।
पोखराका स्थायी बासिन्दा तीर्थ श्रेष्ठ कवि र गीतकारका रुपमा परिचित हुनुहुन्छ । चार दशकदेखि कविता र गीत लेखनमा सक्रिय श्रेष्ठका कविता प्रकृति र सिर्जनासँग बढी जोडिएका हुन्छन् । उनी विभिन्न संघ संस्थामा पनि आवद्ध हुनुहुन्छ। नेवा: खल: कास्कीमा उहाँ पदाधिकारीकै रूपमा आवद्ध हुनुहुन्छ । ‘धर्सैधर्साको चक्रब्यूह’मा श्रेष्ठले जीवनकालमा लेखेका चुनिएका कविता संग्रहित गर्नुभएको छ । यो संग्रह नेपालय पब्लिकेसनले प्रकाशन गरेको हो ।हालसालै मदन पुरस्कार गुठीले २०७६ को मदन पुरस्कारका लागि सात पुस्तकको सूची सार्वजनिक गरेको छ । गुठीले वर्षभरि प्रकाशित भएका १ सय ५१ पुस्तकबाट अन्तिम सात पुस्तकलाई सार्वजनिक गरेको हो । यीमध्ये एउटा कृतिले यो वर्षको मदन पुरस्कार प्राप्त गर्ने छ ।

२०१३ सालदेखि प्रदान गरिंदै आएको मदन पुरस्कारलाई नेपाली साहित्यको विशिष्ट पुरस्कार मानिन्छ ।
कवि तीर्थ श्रेष्ठलाई बधाई !