गोंग:बुंमा भेटिएको शिर काटिएको लास काण्ड -अन्तरंग तस्वीर फेसबुकमा पोस्ट गरेर ब्लायकमेल गर्न थालेपछि हत्या

काठमाडौँ / गाेङ्गबुमा सुटकेसभित्र टाउको फेला परेका रोल्पाको रुन्तीगढी गाउँपालिका स्थायी घर भई काठमाडौँ बस्दैआएका कृष्णबहादुर बोहोरालाई दहीमा स्लिपिङ ट्याबलेट हालेर बेहोस भएपछि अण्डकोषमा हानेर हत्या गरिएको साबिती बयान दिएको प्रहरी अनुसन्धानबाट खुलेको छ ।
प्रहरीले बोहोराको हत्याकाण्डमा संलग्न चितवन कालिका नगरपालिका वडा नं ७ स्थायी घर भएर काठमाडौँ जिल्ला टोखा नगरपालिका १० बस्ने ३७ वर्षीया कल्पना मुडभरी पौडेलले दहीमा स्लिपिङ ट्याबलेट हालेर बेहोस भएपछि हत्या गरेको साविती बयान दिएकी छिन् ।
हत्यामा संलग्न कल्पनाले मृतक बोहोराले आफ्नो नक्कली फेसबुक आईडी बनाएर आफूलाई दुःख दिन थालेपछि हत्या गरेको साविती बयान दिएको अपराध अनुसन्धान महाशाखा प्रमुख दीपक थापाले भन्नुभयो ।
आफ्नो अन्तरङ्ग तस्बिरहरू एकाएक फेसबुकमा फेक आइडी बनाएर सार्वजनिक हुन थालेपछि योजना बनाएर हत्या गरेको प्रारम्भिक बयान दिएको एससपी थापाले भन्नुभयो ।
प्रहरीले अभियुक्तलाइ चितवनको शक्तिखोरमा रहेको अभियुक्तको माइतीबाट पक्राउ गरेर मङ्गलबार काठमाडौँमा पत्रकार सम्मेलन आयोजना गरेको हो ।
कसरी भयो हत्या ?
रोल्पा रुन्तीगढी गाउँपालिका स्थायी घर भइ गोङ्गबुमा बस्ने मृतक बोहोरा र काठमाडौँको टोखा नगरपालिका १० बस्ने अभियुक्त कल्पनाबीच लामो सम्बन्ध रहेको अनुसन्धानबाट खुलेको एसएसपी थापाले बताउनुुभयो ।
मृतक आठ महिनादेखि गोङ्गबुको होटलमा बस्दैआएको र तीन चार महिनादेखि फेसबुकमार्फत चिनजान भएको थियो । मृतक अभियुक्तको कोठामा समय समयमा आउने गरेको अनुसन्धानमा खुलेको प्रहरीले जनाएको छ ।
मृतकले अभियुक्तको फोटो फेसबुुकमा राखेर आफू अनुकूल चलाउन खोजेपछि हत्या भएको बताइएको छ । हत्या भएको दिनमा समेत मृतक बोहोरा आफू बसेको होटलबाट बा ७२ प ५६४४ नम्बरको स्कुटर प्रयोग गरेर अभियुक्तको कोठामा पुगेका थिए । कोठामा पुगेपछि अभियुक्तले मासु चिउरा, दही र भोड्का खान दिएको खुलेको छ ।
अभियुक्तले दिएको दहीमा दहीमा पाँच पिस स्लिपिङ ट्याबलेट हालेपछि मृतक लठ्ठ भएको मौकामा मारतोल (ह्यामर) ले प्रहार गरेका थिए । त्यसपछि मृतकलाई सलको प्रयोग गरी घाँटीमा थिचेर मृत्यु भएको यकिन गरेको प्रहरी अनुसन्धानबाट खुलेको छ । निजलाई धारिलो हतियारको प्रयोग गरेर टाउको र खुट्टा छिनाइ झोलामा आफैँले राखेर फालेको अनुसन्धानबाट खुलेको हो ।
प्रहरीका अनुसार शवको बाँकी रहेको भाग कालो रङ्गको सुटकेसमा राखेर पश्चिम बाटोको छेउमा फालेर कोठामा फर्किआएकी थिइन् । साउन २५ गते चितवनबाट बिरामी लिएर आएको चिनेजानेको एम्बुलेन्ससँग समन्वय गरेर उनी चितवन भागेकी थिइन् ।
प्रहरीले अभियुक्तको कोठाबाट घटनामा प्रयोग भएको धारिलो हतियार, हिर्काउन प्रयोग भएको ह्यामर, रगत लतपतिएको पञ्जा, म्याट्रेसको टुक्रा, घाँटी कस्न प्रयोग भएको कालो रङको सल, सुटकेसको ह्याण्डल, नाम्लोमा प्रयोग हुने डोरीको टुक्रा, स्लिपिङ ट्याबलेटको खोल र मोबाइल सेटहरू बरामत गरेको छ ।
प्रहरीले शव व्यवस्थापनमा सहयोगीको भूमिका निभाउने १५ वर्षको विद्यार्थीलाई समेत नियन्त्रणमा लिएको छ । अभियुक्त केही टेलिश्रृङ्खलाहरूमा अभिनय गर्ने कलाकारसमेत हुन् ।
केशवराज पौडेल
साभार : तस्बिरः सुजन गुरुङ
गोरखापत्र अनलाइन