चङ्गाहरु

– उत्तम मानन्धर
यता,
चङ्गाहरु
आकाशतिर
उडिरहेका छन्
च्यातिएर तालिएका पखेटा बोकेर
भाँचिएका अस्थिपञ्जर
जबर्जस्ती जोडेर
कालो बादल,
आँधीबेहरी छिचोलिरहेका
माथि माथि झन् माथि
आफ्नो अस्तित्व बचाउन
प्रयासरत छन् ।
उता
केही अदृश्य हातहरु र
तिनका धूर्त औंला हरु
दूषित मनसायले सबलाउन व्यस्त छन्
ति चङ्गाहरुलाई
आफ्नो औंलामा धागोले बाँधेर
आफु अनुकूल,
नजिक तान्ने र छोडने
कःका मिलाउने ग्वाँख थप्ने
अनि एक आपस मा भिडाई
घातक प्रहारले
चेट पार्ने षडयन्त्र रच्दैछन् ।
अहिले
केही लोभी पापीहरु र
ती धुर्त औंला हरुको
ओहोर दोहार बाक्लीदै छ ।
२०७७ जेष्ठ १४ गते