असं व ज्याथाय् कोरोना संक्रमित, महाबौद्धया नारायणी आर्केड शील यायेगु तयारी

येँ/येँया मू बजाः असंया भमुलु, गोसिफलय् बालं च्वनाच्वंपिं छगू परिवारयात व ज्याथाय् छम्हेसित कोरोना संक्रमण पुष्टि जूगु दु । महाबौद्धयया नारायणी आर्केडय् होलसेल पसः तयाच्वंपिं असनय् बालं च्वनाच्वंपिं उगु परिवारया दाजु केहेँयात कोरोनाया लक्षण खनेदयेवं उमिगु स्वास्थ्य परीक्षण याःगु खः । परीक्षणय् निम्हेसिके कोरोना पोजिटिभ खने दयेवं परिवारया मेपिं स्वम्ह छेँजःयात नं म्हिगः एम्बुलेन्सय् तयाः अस्पतालय् यंकूगु खः ।

अथेहे ज्याथाया व्यायाम मन्दिर लिउने च्वंम्ह छम्ह व्यक्तियाके नं कोरोनाया संक्रमण जूगु पुष्टि जूगु दु । किड्नीया विरामी थः अबुया जलास्येँया ल्वय् सम्बन्धी परामर्श यायेत भारत वंम्ह वज्राचार्य थरया उम्ह व्यक्तियाके संक्रमण जूगु लूगु खः । परामर्श कयाः लिहां वयाः थःगु छेँय् च्वनाच्वंगु खःसा लिपा कोरोनाया संकेत खनेदयेवं पाटन अस्पताल भर्ना जूगु खँ २७ वडाया अध्यक्ष चिनियाँमान वज्राचार्यं कनादीगु दु ।

असनय् च्वंपिं संक्रमितत छुं न्हि न्ह्यव जक भारतया सितामढीं लिहां वःगु खँ स्थानीय वासिन्दा योगेश खड्गीं कनादीगु दु । वय्कःया कथं छेँथुवाः मदुगु छेँय् थुपिं बालं च्वनाच्वंगु खःसा नेपालय् लकडाउन जुइधुंकाः भारत लिहां वंगु खः । भारतं लिहां वःगु छुं न्हिं लिपा उमिके कोरोनाया लक्षण खनेदयेवं पीसीआर जाँच याःगु खः । उमिके संक्रमण जूगु पुष्टि जुइवं टेकु अस्पताल यंकूगु खः ।

भारतं लिहां वयेधुंकाः संक्रमितत महाबौद्धया पसलय् च्वनेगु नं याये धुंकूंगुलिं थनया बजाः बन्द यायेमाःगु खँ पिहां वयाच्वंगु दु । महाबौद्धया पसः बन्द यायेत स्थानीय जनतायात इनाप यानागु खःसां स्थानीय जनतां धाःसा साथ मबिउगु खँ अध्यक्ष वज्राचार्यं कनादीगु दु । वय्कलं प्रहरी प्रशासनयात नं महाबौद्ध लागाया पसः बन्द याकाः कन्ट्रयाक्ट ट्रेसिङ याकेगु निंतिं इनाप यानागु व प्रहरी प्रशासनं पोजिटिभ वल धाःसा पसः तिकेगु निंतिं माःगु भूमिका म्हितेगु आश्वासन बिउगु जानकारी नं बियादीगु दु ।

वय्कलं थम्हं महाबौद्धया नारायणी आर्केड शिल यायेगु कथं तयारी यानागु खःसां नं सुनां यायेगु धइगु स्पष्ट नीति मदुगुलिं म्हिगः बजाः शिल यायेमफुगु खँ कनादिल । वय्कःया कथं म्हिगः हे न्यय्म्ह व्यक्तियात कोरोना परीक्षण यायेगु निंतिं थम्हं छ्वयागु खःसां नं शुक्रराज ट्रपिकल अस्पतालं १ बजे लिपा स्वाब कलेक्सन यायेगु ज्या मजुइगु धकाः लित छ्वयाहःगु खँ नं कनादीगु दु । थौं १० बजे निसें वडाय् हे परीक्षण यायेगु तयारी जुयाच्वंगु खँ नं वय्कलं धयादीगु दु ।

येँया मू बजारय् कोरोना पोजिटिभ खनेदयेवं नारायणहिति दरवारया सेनां नं जानकारी काःवःगु दु । सेनां नं आवश्यक जुल धाःसा बजाः बन्द याकेगु निंतिं ग्वाहालि यायेगु आश्वासन थःपिंत बिउगु खँ नं वय्कलं कनादीगु दु । थ्वहे झ्वलय् नारायणी आर्केडय् पसः तयाच्वंम्ह छम्ह व्यापारीं नं आः थःपिं गुलि सुरक्षित खः मखु धकाः जाँच यायेमाःगु अवस्था वःगु धासें थःपिं आः ग्याः चिकुया दथुइ म्वायेमालाच्वंगु खँ कंगु दु । वय्कलं नं थनिंनिसें आर्केड शिल यायेफइगु सम्भावना दुगु खँ कनादिल । वय्कलं महानगरपालिकाया मनूतय्सं कन्हय् निसे पसः बन्द जुइफु धाःगु खँ कनादीगु दु ।

थ्वहे झ्वलय् येँ महानगरपालिका जनस्वास्थ्य विभागया प्रमुख नरेन्द्रविलाश जोशी नं आवश्यक जुल धाःसा महाबौद्ध क्षेत्रया पसः बन्द यायेमाले फुगु खँ धयादीगु दु । वय्कलं थनिंनिसें कन्ट्रयाक्ट ट्रेसिङ यायेगु तयारी जुयाच्वंगु जानकारी बियादिसें आवश्यक जुल धाःसा बजाः बन्द यायेफइगु खँ कनादीगु दु ।
साभार:नेभाटा