नेपालभाषाया म्येया अडियो च्यानल न्ह्यात !

यें / चांन्हिं मदिक्क नेपालभाषाया म्ये न्यनेदइगु न्हूगु अडियो च्यानलया उलेज्या जूगु दु ।
यें छगू ज्याझ्व: यासें ने.सं. ११४० दिल्लागा द्वादशी बिहिवाः खुन्हु थुगु च्यानलया उलेज्या जूगु ख: । जनकवि दुर्गालाल श्रेष्ठया बुदिंया लसता लाका: च्यानलया उलेज्या लोकंह्वा:म्ह वरिष्ठ म्ये हालामि जुजुकाजी रञ्जितं यानादीगु खः । अनलाइन पाखें जनकवि श्रेष्ठं नं ज्याझ्वलय् ब्वति कायादीगु खः । ताहाचः बगैंचा येँया एएनजे स्टुडियोया सङ्गीतकःमिपिं आभाष जोशी व जीनु जोशीपिन्सं बटम क्लिक याना च्यानलय् म्ये हायेकादीगु खः । रमेश जोशीं संयोजन यानादीगु थुगु च्यानल http://newamey.com/ चांन्हिंं न्ह्याग्गु इलय् नं न्यनेदइ ।
थुुगु च्यानल सुथांलाक्क न्ह्याकेया नितिं बिद्या सागर प्रधान (अमेरिका) व उज्ज्वल कुमार जोशी (जर्मनीं)ग्वाहालि याना च्वनादीगु खँ धा:गु दु । “नेपालभाषाया न्हूगु च्यानल मदिक्क न्ह्याना वने फयेमा ” धासें जनकवि दुर्गालाल श्रेष्ठं ज्याझ्वलय् भिंतुना देछानादीगु ख: ।